नागपूर : प्रेमाचा त्रिकोण; प्रियकराचा खून करण्याचा प्रयत्न

पोलिसांनी दिलेल्या माहितीनुसार, रश्मिका (२४, काल्पनिक नाव) ही आरोपी नेहाल (३५) याची नातेवाईक असून त्यांचे प्रेमसंबंध होते. मात्र, रश्मिकाचे लग्न नेहालच्या नातेवाईक युवकासोबत झाले. त्यामुळे दोघांचे प्रेमसंबंध संपुष्ठात येण्याऐवजी पुन्हा बहरले. नात्यातच लग्न झाल्याने दोघांचेही अनैतिक संबंधाबाबत कुणालाही कुणकुण लागली नाही. नेहालनेही कुटुंबीयांच्या सांगण्यावरून लग्न केले. मात्र, काही दिवसांतच त्याने पत्नीशी वाद घालून माहेरी पाठवले. रश्मिका आणि नेहालचे प्रेमसंबंध वाढल्यानंतर तिच्या पतीला अनैतिक संबंधाबाबत संशय आला. ‘नको त्या अवस्थेत’ बघितल्यानंतर त्याने पत्नी रश्मिकाला घरातून बाहेर काढले. त्यानंतरही नेहाल आणि रश्मिकाचे प्रेमसंबंध कायम होते.

हेही वाचा – चंद्रपूर : ५५ वाघांना बेशुद्ध करून जेरबंद करणाऱ्या डॉक्टर व चमूबद्दल जाणून घ्या..

माहेरी राहणाऱ्या रश्मिकाची ओळख स्वत:चे गॅरेज असलेल्या सचिन महंत (३०, तरोडी, वाठोडा) याच्याशी झाली. गेल्या दोन वर्षांपासून दोघांचे सूत जुळले. रश्मिकाच्या प्रेमात वेडा झालेला सचिन लग्न करण्यासाठी तगादा लावत होता. तिला महागड्या भेटवस्तू आणि कपडे घेऊन देत होता. सचिन तिला भेटायला गेल्यानंतर नेहाल हा तिच्या घरात झोपलेला त्याला दिसला. त्याच्या प्रकार लक्षात आल्याने तो रागारागात निघून गेला. त्याने रश्मिकाला प्रेमसंबंध संपल्याचे सांगून भेट दिलेला महागडा मोबाईल परत मागितला. तिने प्रियकर नेहालला सचिनचा काटा काढण्याबाबत सांगितले. मंगळवारी रात्री साडेदहा वाजता नेहालने सचिनला दिघोरी चौकात गाठले आणि त्याच्यावर चाकूने हल्ला करीत खून करण्याचा प्रयत्न केला. मात्र, नागरिकांनी धाव घेतल्यामुळे सचिन थोडक्यात वाचला. या प्रकरणी हुडकेश्वर पोलिसांनी गुन्हा दाखल करून नेहालला अटक केली.