भंडारा : शस्त्रक्रियेसाठी पैशाची गरज असल्याने बँकेत सोने तारण ठेवून कर्ज घेतले. मात्र, बँकेच्या व्यवस्थापकाने खातेधारकाचे कोरे धनादेश वापरून १७ लाख ७६ हजार रुपयांची रक्कम पत्नीच्या खात्यावर वळती केली. फसवणूक झाल्याचे लक्षात येताच खातेधारकाने पोलिसांकडे धाव घेतली. हा खळबळजनक प्रकार भंडारा येथील ‘मनप्पुरम गोल्ड लोन बँके’त उघडकीस आला आहे. घटनेनंतर बँकेचा व्यवस्थापक रोहित दयाराम साहू (रा. पठावाले, खरगापूर, जि. टिकमगढ़, मध्य प्रदेश) हा पसार झाला आहे.
हिमांशू अमित जोशी यांच्या नावाचे भंडारा येथील गांधी चौक स्थित मनप्पुरम गोल्ड लोन बँकेत खाते आहे. वडिलांच्या आजारपणामुळे त्यांना पैशाची गरज होती. त्यामुळे त्यांनी मनप्पुरम शाखेत १९ जुलै २०२५ रोजी २९२ ग्राम सोने तारण ठेवले होते. या बदल्यात हिमांशू यांच्या युको बँकेच्या बचत खात्यात १८ लाख ७२ हजार रुपयांची रक्कम जमा झाली. मात्र, काही अपरिहार्य कारणांमुळे हिमांशू यांच्या वडिलांची शस्त्रक्रिया महिनाभर लांबली. त्यामुळे कर्जाची रक्कम त्यांच्या खात्यातच होती.
पैशाची गरज नसल्याने खात्यावर जमा असलेली रक्कम परत करण्यासाठी हिमांशू मनप्पुरम शाखेत गेले. येथील व्यवस्थापक रोहित साहू यांनी रक्कम वळती करण्यासाठी दोन कोरे धनादेश घेतले आणि सध्या सर्व्हर डाऊन आहे, दोन दिवसांत रक्कम खात्यात आल्यावर सोने परत घेऊन जाल, असे सांगितले.
अशी झाली फसवणूक…
हिमांशू जोशी यांनी बँक व्यवस्थापक रोहित साहू याला जे दोन कोरे धनादेश दिले होते, त्याआधारे साहू याने त्याच्या पत्नीच्या खात्यावर अनुक्रमे १६ लाख ८१ हजार ८०० व २५ हजार रुपये, असे एकूण १७ लाख ७६ हजार ८०० रुपयांची रक्कम वळती केली. आरटीजीएसच्या सहाय्याने रक्कम वळविल्याचे स्टेटमेंटमध्ये उघडकीस आली आहे.
हिमांशू जोशी यांनी मनप्पुरम बँकेत सोने गहाण ठेवले होते. मात्र, व्यवस्थापक साहू याने त्या सोन्यापैकी ३४ ग्राम सोने मनप्पुरममधून काढून अन्य बँकेत स्वतःच्या नावाने गहाण ठेवल्याचाही प्रकार उघडकीला आला.
‘मी माझी लाइफ सेट केली’
हिमांशूच्या वडिलांनी रोहित साहू याला फोन केला असता त्याने, मी माझी लाइफ सेट केली आहे. पैसे देणार नाही, असे उत्तर दिल्याचे अमित जोशी यांनी सांगितले. २९२ ग्रॅम सोने बँकेत गहाण ठेवण्यात आले होते. आठ दिवसांचा कालावधी लोटूनही मनप्पुरम बँक व्यवस्थापनाने याप्रकरणी खातेधारकाला हवी तशी मदत केली नाही.
तपास सुरू
या फसवणूक प्रकरणाबाबतची तक्रार पोलीस ठाण्यात करण्यात आली आहे. त्या दिशेने आमचा तपास सुरू आहे. योग्य ती कारवाई केली जाईल, असे भंडारा पोलीस निरीक्षकर उल्हास भुसारी यांनी सांगितले.
व्यवस्थापकाकडून प्रतिसाद नाही
बँकेत झालेल्या गैरव्यवहाराबाबतची माहिती वरिष्ठांना कळविली आहे. खातेधारक हिमांशू जोशी यांना बँकेतर्फे आवश्यक ते सहकार्य केले जाईल. साहू याला मोबाइलद्वारे संपर्क करण्याचा प्रयत्न सुरू आहे. मात्र, ते प्रतिसाद देत नाही. खातेधारकाने पोलिसांकडे तक्रार दिल्याची माहिती आम्हाला मिळाली आहे, अशी माहिती मनप्पुरम गोल्ड लोन बँकेचे प्रभारी व्यवस्थापक सुमित सोनटक्के यांनी दिली.
