नागपूर : पुण्यातील प्रतिष्ठित मॉडर्न कॉलेजमध्ये दलित तरुणावर अन्याय झाल्याची गंभीर घटना समोर आली असून, यामध्ये भाजपशी संबंधित प्राध्यापकांवर गंभीर आरोप झाले आहेत. प्रेम बिर्‍हाडे या दलित विद्यार्थ्याचे करिअर एका चुकीच्या वागणुकीमुळे उद्ध्वस्त झाले असून, यामागे जातीय मानसिकतेचा गंध असल्याचे आरोप होत आहेत.

प्रेम बिर्‍हाडे हा एका छोट्या गावातून येऊन कठोर मेहनतीने शिक्षण घेत होता. त्याने लंडनमधील नामांकित कंपनीमध्ये नोकरी मिळवली होती. मात्र त्याच्या महाविद्यालयातील एका प्राध्यापकाने त्याच्या ‘कॅरेक्टर सर्टिफिकेट’मध्ये अडथळा निर्माण केला आणि त्यामुळे त्याची नोकरी हातातून गेली. विशेष म्हणजे संबंधित प्राध्यापक हे भाजपशी संबंधित असल्याची माहिती पुढे आली आहे.

ही घटना केवळ एका व्यक्तीच्या आयुष्यावर परिणाम करणारी नसून, संपूर्ण समाजातील दलित, शोषित आणि वंचित वर्गाच्या तरुणांवर अन्याय करणारी आहे. जातीय अहंकारातून प्रेरित झालेली ही मनुवादी मानसिकता अजूनही शैक्षणिक संस्थांमध्ये कार्यरत आहे, हे दुर्दैवी वास्तव यामुळे समोर आले आहे.

या घटनेविरोधात समाजातून तीव्र प्रतिक्रिया उमटत असून, अनेक सामाजिक कार्यकर्त्यांनी आणि नेत्यांनी या प्रकाराचा निषेध केला आहे. काँग्रेस नेते विजय वडेट्टीवार यांनी यावर एक्स (ट्विट) करत भाजपवर जोरदार टीका केली आहे. त्यांनी म्हटले की, “आजही शिक्षण संस्थांमध्ये जात पाहून वागणूक मिळत असेल, तर डॉ. बाबासाहेब आंबेडकरांचा संघर्ष व्यर्थ ठरतो. हा अन्याय सहन केला जाणार नाही.”

प्रेम बिर्‍हाडेच्या भविष्याचे काय होणार? त्याचे नुकसान भरून कसे निघणार? या प्रश्नांची उत्तरं सत्ताधाऱ्यांनी द्यावी, अशी मागणी होत आहे.

ही घटना संपूर्ण व्यवस्थेच्या जबाबदारीवर प्रश्नचिन्ह निर्माण करणारी असून, देशातील शैक्षणिक क्षेत्रात असलेला जातीयवाद संपवण्यासाठी कडक उपाययोजना करण्याची गरज अधोरेखित करते. जात, धर्म किंवा राजकीय ओळखीच्या आधारे विद्यार्थ्यांवर अन्याय होणार असेल, तर अशा व्यवस्थेचा विरोध करण्याची वेळ आली आहे, अशी भावना युवकांमध्ये निर्माण झाली आहे.