अकोला : जन्मजात कर्णबधिरतेवर दुर्दम्य इच्छाशक्तीने मात करीत चित्रकलेच्या बळावर आंतरराष्ट्रीय स्तरावर महाराष्ट्राचे नाव मूळ अकोलेकर चित्रकार वैभव तानाजी सांगळे यांनी उज्ज्वल केले. नवी दिल्ली येथे आयोजित ‘स्पेशल एक्सपो: सूत्रांचा प्रवास’ मध्ये ते सहभागी झाली आहेत. यांच्या चित्रांतून साकारलेल्या ‘भावस्पर्शी कलाविष्कारा’ने देशभरातील कलाप्रेमींचे लक्ष वेधून घेतले.
भारतीय पारंपरिक हातमाग आणि हस्तशिल्प कलेला प्रोत्साहन देण्यासाठी आयोजित विशेष प्रदर्शनात देशभरातील ७५ विणकर, स्वयंसहायता गट आणि सहकारी संस्था सहभागी झाल्या आहेत. या प्रदर्शनात विविध राज्यांच्या कलाकारांनी आपआपल्या क्षेत्रातील पारंपरिक वस्त्र आणि शिल्पकला प्रदर्शित केल्या आहेत. या प्रदर्शनात वैभव सांगळे यांनी ‘पोट्रेट्स’, निसर्ग चित्र, ग्रामीण जीवन आणि वारली चित्रकला साकारल्या आहेत.जन्मतः कर्णबधिर असल्याने चौथ्या वर्षापर्यंत बोलता-ऐकता न येणाऱ्या वैभव यांचे कर्णबधिरत्व त्यांच्या आई-वडिलांच्या अथक प्रयत्नांमुळे ७० टक्क्यापर्यंत कमी झाले.
वयाच्या चौथ्या वर्षापासून वडिलांनी हातात पेन्सिल-ब्रश देऊन चित्रकलेची आवड निर्माण केली. अनेक अडचणींचा सामना करत त्यांनी शिक्षण घेतले. चित्रकलेच्या सीईटी परीक्षेत अपंगातून प्रथम येऊन मुंबईतील सर जे.जे. स्कूल ऑफ आर्ट्समध्ये त्यांनी धडे गिरवले. चित्रकलेत त्यांनी प्रभुत्व प्राप्त केले आहे. वैभव सांगळे यांनी जिद्द आणि कलेच्या सामर्थ्यावर कर्णबधिरतेवर मात करून उल्लेखनीय कार्य केले. त्याची दखल घेऊन सन २०२३ चा राष्ट्रीय सर्वश्रेष्ठ दिव्यांग जन पुरस्काराने राष्ट्रपतींच्या हस्ते त्यांना सन्मानित केले.
कर्णबधिर, ग्रामीण भागातील महिलांना तसेच जिल्हा परिषद शाळेतील मुलांना मोफत प्रशिक्षण देण्यासाठी वैभव यांनी पुढाकार घेत समाजाप्रती आपले कर्तव्य निभावले. अनेक अनाथ आश्रमांमध्ये आणि दिव्यांगांना चित्रकलेचे त्यांनी प्रशिक्षण दिले आहे.
आंतरराष्ट्रीय स्तरावर कलेचा गौरव
वैभव यांच्या कलाकृतींनी सातासमुद्रापार मजल मारली असून, इंग्लंड, अमेरिका, कॅनडा, जर्मनी, रशिया, फ्रान्स यांसारख्या देशांमध्ये त्यांची कला पोहोचली आहे. अमेरिकन दूतावास, मुंबई येथे त्यांच्या चित्रांचे प्रदर्शन आयोजित करून त्यांचा सन्मान करण्यात आला होता.
राष्ट्रपती भवनात विशेष सन्मान
एकाच वर्षात राष्ट्रपती भवनाकडून दोनदा सन्मानित होण्याचा दुर्मीळ मान वैभव यांना मिळाला. त्यांनी काढलेले राष्ट्रपतींचे खास चित्र राष्ट्रपती भवनात लावण्यात आले असून, त्यांच्या चित्रांचे तीन दिवसीय प्रदर्शनही राष्ट्रपती भवनात भरवण्यात आले होते.
