शेतकरी नेते रविकांत तुपकर यांच्या वाहनाला ट्रकची धडक, सर्वजण बचावले

लातूर येथून जालन्याकडे जात असताना रविवारी मध्यरात्री साडेबारा ते एक दरम्यान हा अपघात झाला. रविकांत तुपकर इनोव्हाने(क्रमांक एम एच २८ बि क्यू ९९९९) जात होते. ते पारगाव टोल नाक्यावर थांबले होते. दरम्यान मागून भरधाव वेगात आलेल्या कने गाडीला जोरदार धडक दिली. ट्रक चालक मद्यधुंद अवस्थेत होता. गाडीतील मागील सीटवर बसलेले लोक अक्षरशः समोर फेकले गेले.

या अपघातात सुदैवाने रविकांत तुपकर यांना कोणतीही दुखापत झाली नसून ते पूर्णतः सुरक्षित आहेत. मात्र गाडीत त्यांच्यासोबत असलेले स्वीय सहायक कार्तिक सवडतकर व राजाराम जाधव यांना सौम्य मार लागला आहे. चालक अजय मालगे व सहकारी गजानन नाईकवाडे यांना कोणतीही दुखापत नाही. अपघाताची माहिती मिळताच पोलिसांनी तातडीने घटनास्थळी धाव घेतली. चालकासह ट्रकमधील क्लिनरला पोलिसांनी ताब्यात घेतले असून ट्रकही जप्त करण्यात आला आहे.

हा अपघात होता की घातपाताचा प्रयत्न, याबाबत अनेक शंका उपस्थित होत असून पोलिसांकडून दोन्ही बाजूंनी तपास सुरू करण्यात आला आहे. या प्रकरणाचा तपास वाशी पोलीस स्टेशनचे पोलीस निरीक्षक संग्राम थोरात यांच्या मार्गदर्शनाखाली सुरू आहे.

रविकांत तुपकर हे राज्यात कर्जमुक्तीच्या प्रश्नावर दौऱ्यावर आहेत. नुकतेच त्यांनी नाशिक, परभणी, बीड येथील दौरे पूर्ण केले असून आज अंबाजोगाई तालुक्यातील देवळा येथे ‘कर्जमुक्ती एल्गार सभेला संबोधित केले. सभा आटोपून त्यांनी लातूर जिल्ह्यातील तांदुळजा येथे कार्यकर्त्यांसोबत स्नेहभोजन घेतले व त्यानंतर रात्री ११ वाजता जालन्याच्या ते दिशेने मार्गस्थ झाले असताना वाशी जवळ हा अपघात घडला.

या अपघातामुळे संघटनेच्या कार्यकर्त्यांमध्ये राज्यभर खळबळ उडाली . मात्र तुपकर हे सुखरूप असल्याचे समजताच सर्व कार्यकर्त्यांनी सुटकेचा निश्वास घेतला. या अपघाताचे गांभीर्य लक्षात घेता पोलीस यंत्रणांकडून सखोल व सर्व बाजुनी चौकशी व्हावी अशी मागणी क्रांतिकारी संघटनेच्या कार्यकर्त्यांकडून होत आहे. ट्रक चालक संभाजी डोंगरे (पंढरपूर )याचेवर वाशी पोलीस स्टेशन ला कलम २८१,कलम १८५ अन्वये गुन्हा दाखल केला आहे. ही कायदेशीर प्रक्रिया आज रविवारी सकाळी 5 वाजेपर्यंत चालू होती.