जवळ आला पोळा, तरी पाऊस उघडेना डोळा! शेतकऱ्यांच्या आकाशाकडे नजरा; पावसाअभावी दुष्काळाचे सावट

पोळ्याच्या पार्श्वभूमीवर बाजारात बैल सजावट साहित्य विक्रीसाठी आले आहेत. त्यानंतर गणेशोत्सव आणि महालक्ष्मीचे आगमन असल्यामुळे बाजारपेठेत सजावट साहित्यांची दुकाने सजली आहेत. परंतु, खरेदीसाठी ग्राहकांची गर्दी नसल्यामुळे बाजारात उत्साह नाही. बैलांची सजावट, शिंग छाटणे, रंगरंगोटी, बैलाच्या झुली, घुंगरमाळा, वेसन, मोरक्या, कासरे, गोंडे, घंटी, आदी साहित्य खरेदीसाठी शेतकऱ्यांची आठ दिवसांपासूनच लगबग सुरू होते. मात्र यावर्षी निसर्गाच्या लहरीपणामुळे बळीराजा चिंताक्रांत झाला आहे.

हेही वाचा : दीक्षाभूमीला २०० कोटींचा निधी; मोठा स्टेज, भव्य पार्किंग, दोन वर्षांत रूपडे पालटणार…

बाजारात मंदीचे सावट

आठ दिवसांवर पोळा येऊनही पाऊस धो-धो न बरसल्यामुळे शेतकऱ्यांमध्ये उत्साह नसल्याचे दिसते आहे. एकंदरीत, पोळा सणावर मंदीचे आणि दुष्काळाचे सावट आहे. आता श्रावणानंतर गणेशोत्सव, महालक्ष्मी, नवरात्र, दसरा, दिवाळी हे सण आहेत. पाऊस चांगला झाला नाही तर शेती उत्पादनात घट होण्याची शक्यता नाकारता येत नाही. यामुळे शेतकऱ्यांचे डोळे आभाळाकडे लागले आहे.

हेही वाचा : बुलढाणा: मराठा आरक्षण उपोषण अन् मराठा क्रांती मोर्चा; प्रशासनाची डोकेदुखी वाढली

धानपिकाला पावसाची गरज

शेतकऱ्यांच्या पाचवीलाच संकटे पुजलेलीच असतात. धानरोवणी करेपर्यंत तुरळक प्रमाणात पाऊस बरसला. आता घाम गाळून मेहनतीने जगवलेली पिके जोमात असताना पाऊस गायब झाला आहे. दोन-चार दिवसांआधी बरसलेल्या पावसाने पिकांना नवसंजीवनी मिळाली. मात्र ऊन तापत असल्यामुळे जमिनीला भेगा पडून पिके करपण्याची भीती आहे. मुसळधार पाऊस न झाल्यामुळे नदी, नाले, तलाव, विहीरींचा जलस्रोत कमी होत चालला आहे. त्यामुळे आतापासूनच जलसंकट ओढावणार, अशी शंका व्यक्त केली जात आहे. यावर्षीच्या पावसाळ्यात सरासरी पाऊस बरसला नाही. पोळ्यानंतर पाऊस भोळा होतो, असा आजवरचा अनुभव. मात्र यावर्षी पोळा आला तरी पावसाने डोळा उघडलेला नाही.