अकोला : हैदराबाद-जयपूर साप्ताहिक विशेष रेल्वेला मुदतवाढ देण्यात आली आहे. या रेल्वेच्या आणखी प्रत्येकी नऊ फेऱ्या होणार आहेत. नांदेड, अकोला, खंडवा, भोपाळ, उज्जैन, अजमेर मार्गे धावणारी हैदराबाद-जयपूर साप्ताहिक विशेष रेल्वेला प्रवाशांची अतिरिक्त गर्दी लक्षात घेता मुदतवाढ देण्यात आली. रेल्वे प्रशासनाने प्रवाशांच्या सोयीसाठी साप्ताहिक विशेष रेल्वे सेवांचा कालावधी वाढवला आहे.
हेही वाचा : “ही तर पुरोगामी महाराष्ट्राला काळीमा फासणारी घटना”, रामटेकच्या घटनेवर प्रतिक्रिया
गाडी क्रमांक ०७११५ हैदराबाद – जयपूर साप्ताहिक विशेष रेल्वेची सेवा १ डिसेंबरपासूनपासून २६ जानेवारीपर्यंत वाढविण्यात आली असून नऊ फेऱ्या हैद्राबाद येथून चालवण्यात येतील. रेल्वे गाडी क्रमांक ०७११६ जयपूर – हैदराबाद साप्ताहिक विशेष रेल्वेची सेवा ०३ डिसेंबरपासून ते २८ जानेवारीपर्यंत वाढविण्यात आली. या गाडीच्या नऊ फेऱ्या जयपूर येथून चालवण्यात येतील. रेल्वे फेऱ्यांचे वेळापत्रक आणि थांबे यात कुठलाही बदल करण्यात आलेला नाही.
