एनआयएची अचलपुरात छापेमारी, युवकाची चौकशी; कारवाईबाबत कमालीची गुप्तता…

अमरावती : राष्‍ट्रीय तपास संस्‍थेने (एनआयए) अचलपूर येथे एका घरावर छापा घालून एका युवकाची चौकशी केल्‍याची माहिती समोर आली आहे. ‘एनआयए’च्‍या पथकाने सोमवारी पहाटे ही कारवाई केली. यावेळी स्‍थानिक पोलिसांकडून चोख बंदोबस्‍त ठेवण्‍यात आला होता. या कारवाईमुळे अचलपुरात खळबळ उडाली आहे. ‘एनआयए’चे पथक रात्री २ वाजताच्‍या सुमारास अचलपूर येथील अकबरी चौक परिसरात पोहचले. त्‍यांनी एका घरात पोहचून युवकाची चौकशी सुरू केली. या युवकाच्‍या हालचालींवर राष्‍ट्रीय तपास संस्‍था लक्ष ठेवून होती. सकाळी ६ वाजेपर्यंत ही चौकशी चालली. संबंधित युवक नागपूर येथे शिक्षण घेत असल्‍याची माहिती मिळाली आहे.