आजारी आईचे जेवण, औषधपाणी करायला कंटाळलेल्या मुलाने चाकू आणला अन…

नागपूर : यशोधरानगर पोलीस ठाणे हद्दीतील एका घरात मुलाने आजारी आईची हत्या केली. ही घटना गुरुवारी रात्री उशिरा उघडकीस आली. दुर्गा रतन मेश्राम (५०) रा. संजय गांधी नगर, गोंड मोहल्ला, राणी दुर्गावती चौक असे मृत महिलेचे तर अंकित (२५) असे आरोपी मुलाचे नाव आहे. दुर्गा यांची प्रकृती काही काळापासून खालावली होती. अंकित हा पेटिंगची कामे करायचा. आईच्या आजारपणामुळे तो कंटाळला होता.

आणखी वाचा-गुजरातमधून खत आणून घरातून अनधिकृत विक्री; पुसदमध्ये १० लाखांच्या ८३० बॅग जप्त

गुरुवारी रात्री दुर्गा यांच्या गाल, गळ्याजवळ शस्त्राने वार केल्याच्या खुणा होत्या. त्यांना मेयो रुग्णालयात नेले असता डॉक्टरांनी मृत घोषित केले. त्यावेळी मुलगा अंकित हादेखील तेथे होता. मात्र कुणालाही त्याच्यावर शंका आली नाही. प्रिया यांच्या तक्रारीवरून अज्ञात आरोपींविरोधात गुन्हा दाखल करण्यात आला होता. त्याने त्याच्या जबानीमध्ये विसंगत माहिती दिली व त्यामुळे पोलिसांना संशय आला. ठाणेदार ज्ञानेश्वर भेदोडकर व त्यांच्या पथकाने त्याला दरडावून विचारले असता त्याने हत्या केल्याची कबुली दिली. पोलिसांना आरोपी अंकित म्हणाला, आई (दुर्गा) या बेडवरच असल्यामुळे जेवण, स्वच्छता, औषधपाणी त्यालाच करावे लागायचे. सोबतच त्याला धुणीभांडी, साफसफाई, कचरादेखील उचलावा लागायचा. यामुळे तो कंटाळला होता. त्यातूनच त्याने हत्या केली.