यवतमाळ : शिकवणी वर्गातील अल्पवयीन विद्यार्थिनीसोबत जवळीकता निर्माण करून शिक्षकाने तिच्यावर अत्याचार केले. यातून पीडिता गर्भवती राहिली. नांदेड येथे उपचार सुरू असताना तिचा मृत्यू झाला. ही खळबळजनक घटना उमरखेड तालुक्यातील ढाणकी येथे घडली. संदेश गुंडेकर (२७, रा. ढाणकी) असे आरोपीचे नाव आहे. त्याला भोकर (जि. नांदेड) येथून ताब्यात घेण्यात आले.
गुंडेकर याने त्याच्याच खासगी शिकवणी वर्गात शिकणाऱ्या एका विद्यार्थिनीशी मैत्री करत तिचा विश्वास संपादन केला. त्यानंतर वारंवार क्लासरूममध्येच तिच्यावर अत्याचार केला. ही घटना १ डिसेंबर २०२४ ते १९ सप्टेंबर २०२५ दरम्यान घडली.
पीडिता गर्भवती झाल्यानंतर तिला नांदेड येथे शासकीय रुग्णालयात उपचारासाठी नेण्यात आले. मात्र, तिचा मृत्यू झाला. याप्रकरणी आरोपी संदेश गुंडेकर याला भोकर येथून पोलिसांनी ताब्यात घेतले. विशेष म्हणजे, आरोपी हा मूळचा मराठवाड्यातील रहिवासी आहे. तो मागील काही वर्षांपासून ढाणकी येथे भाड्याच्या घरात खासगी शिकवणी घेत होता.
फियार्दी अल्पवयीन मुलीच्या जबाबावरून बिटरगाव पोलीस ठाण्यात विविध कलमांसह पोक्सो कायद्यानुसार गुन्हा नोंदवण्यात आला. आरोपीला अटक करण्यात आली असून, पुढील तपास बिटरगाव पोलीस ठाण्याचे ठाणेदार पांडुरंग शिंदे यांच्या मार्गदर्शनाखाली पोलीस उपनिरीक्षक सागर अन्नमवार, रावसाहेब मस्के करीत आहेत.
