नागपूर- नागपूर महानगर क्षेत्रातील कोराडी (ता.कामठी) येथे पर्यावरणीय पर्यटन स्थळ (ईकोटुरिझम) विकसित करण्यासाठी नागपूर महानगर प्रदेश विकास प्राधिकरण (एनएमआरडीए) आणि महाराष्ट्र राज्य वीज निर्मिती कंपनी लिमिटेड (महाजनको) यांच्यात मुख्यमंत्री देवेंद्र फडणवीस यांच्या उपस्थितीत मुंबईत सामंजस्य करार करण्यात आला. यावेळी नागपूरचे पालकमंत्री नचंद्रशेखर बावनकुळे उपस्थित होते.
या करारानुसार पर्यटनस्थळ विकसित करण्यासाठी महाराष्ट्र राज्य वीज निर्मिती कंपनीची २३२.६४ हे.आर. जागा नागपूर प्रदेश विकास प्राधिकरणाला ३० वर्षाच्या भाडे करारावर प्रतिवर्ष एक रूपये भाडेपट्ट्यावर हस्तांतरीत करण्यात येणार आहे. महाजेनको कंपनीने भाडे कराराने दिलेली जागा कोराडी, महादुला, खापरखेड़ा, नांदा (तालुका कामठी) आणि घोगली ता. नागपूर (ग्रामीण) या भागातील आहे. ही जमिन नैसर्गिक संसाधनांच्या सान्निध्यात असून, जागतिक दर्जाचे पर्यावरणीय पर्यटन स्थळ विकसित करण्यासाठी उपयुक्त आहे.
या प्रकल्पात नॉन-मोटरायइड बोटिंग (पॅडल बोट्स, कायाक्स, कॅनू), पर्यावरणपूरक शिकारा आणि फ्लोटिंग डेक राइड्स, फ्लोटिंग प्लॅटफॉर्मवरून पक्ष्यांचे निरीक्षण, निसग पर्यटन आदींचा समावेश आहे. प्राधिकरणाला दिलेली जमिन ही जमीन नागपूरच्या महत्त्वाच्या शहरी आणि नैसर्गिक संसाधनांच्या जवळ असल्यामुळे, जागतिक दर्जाचे पर्यावरण पर्यटन स्थळ म्हणून तिचा विकास केला जाणार आहे.
सामंजस्य कराराचे तपशील
- कराराची मुदत: सुरुवातीला ३०वर्षे, वार्षिक भाडे १ रुपया
- महाजेनकोचे अधिकार: सध्याच्या थर्मल पॉवर स्टेशन आणि सांडपाणी प्रक्रिया केंद्र यांच्यावर पूर्ण मालकी व नियंत्रण कायम राहणार.
- प्राधिकरणाचे अधिकार: तलावाच्या जलपृष्ठभागाचा वापर फक्त पर्यावरण पर्यटन प्रकल्पासाठी करण्याचे विशेष हक्क एनएमआरडीएला दिले जातील.
- महाजेनकोच्या संचालक मंडळाने या प्रस्तावास मान्यता दिली आहे.
