नागपूर: महाराष्ट्र लोकसेवा आयोगाच्या परीक्षा आणि निकालामध्ये होणारा विलंब हा कायम चर्चेचा विषय असतो. परंतु, यावेळी परीक्षेच्या गोपनीयतेवरच मोठे प्रश्नचिन्ह निर्माण झाले आहे. त्यामुळे विद्यार्थ्यांचे प्रचंड चिंता वाढली आहे. ही चूक थेट आयोगाकडून झालेली नसली तरी एका छोट्या परीक्षेमध्ये हा प्रकार घडल्याने पारदर्शकतेचा विषयही समोर आला आहे.
दोन वर्षांपूर्वी एमपीएससीकडून माहिती व जनसंपर्क संचालनालयाच्या विविध पदांसाठी जाहिरात काढण्यात आली होती. यासाठी राज्यभरातील विविध उमेदवारांनी अर्ज केले. या जाहिरातीचे दोनदा शुद्धीपत्रकही काढण्यात आले होते. अनेक वर्षांच्या प्रतीक्षेनंतर ही परीक्षा १० मे रोजी मुंबई येथील केंद्रावर घेतली जाणार आहे. परंतु, ही परीक्षा होण्यापूर्वीच मोठा गोंधळ उडाला आहे. या परीक्षेचा अभ्यासक्रम आयोगाने आधीच जाहीर केला आहे. त्या आधारे आयोगाला ऑनलाईन परीक्षेसाठी प्रश्नपत्रिका तयार करायची आहे.
ही प्रश्नपत्रिका तयार करण्यासाठी एमपीएससीने मुंबई विद्यापीठाला पत्र पाठवले. या पत्रामध्ये त्यांनी प्रश्नपत्रिका तयार करण्यासाठी तज्ञ द्यावेत अशी मागणी केली आहे. हे पत्र मुंबई विद्यापीठाने त्यांच्या संकेतस्थळावर प्रसिध्द केले आहे. सोबतच विद्यापीठाने स्वतःचे पत्रही यासोबत संकेतस्थळावर दिले आहे. यामुळे प्रश्नपत्रिका कुठून तयार केले जाणार आहे, ते कोण तयार करणार आहेत, ही माहिती उघड झालेली असल्याने आक्षेप घेतला जात आहे.
एमपीएससीचे जे पत्र प्रसिद्ध केले ते काय आहे बघा
महाराष्ट्र लोकसेवा आयोग या सांविधानिक संस्थेमार्फत महाराष्ट्र शासनाच्या अधिपत्याखालील असलेल्या विभागांच्या विविध पदांसाठी भरती प्रक्रिया राबविली जाते. काही परीक्षांच्या अभ्यासक्रमामध्ये वृत्तपत्रविद्या, जनसंपर्क, जनसंज्ञापन विषयक घटक या विषयाचा समाविष्ट आहे. संबंधित विषयावर आधारित वस्तुनिष्ठ स्वरुपाचे प्रश्नसंच तयार करण्यासाठी तसेच प्रश्नसंच तयार केल्यानंतर चिकित्सण परीक्षण करण्याकरीता सचोटी व कळकळीने काम करणाऱ्या त्याचबरोबर संबंधित विषयात विशेष ज्ञान व नैपुण्य तसेच मराठी व इंग्रजी भाषेचे शान आहे व ज्यांच्या विरुद्ध कोणतीही शिस्तभंग विषयक कार्यवाही सुरु नाही अशा अनुभवी अध्यापकांची तज्ञ म्हणून परीक्षक सूची तयार करावयाची आहे.
सदर पदाच्या अभ्यासक्रमाची प्रत सोबत जोडली आहे. सदर अभ्यासक्रमामधीर नमूद घटक विचारात घेऊन, आपल्या विद्यापीठातील संबंधित विषय प्राध्यापक, सहयोगी प्राध्यापक, सहायक प्राध्यापक अशा सर्व अध्यापकांच्या नावांची यादी, त्यांची संपूर्ण नावे, पदनाम, विभागाचे नाव, पदावरील कार्यकाल, निवासाचा पत्ता, कार्यालयाचा व घरचा दूरध्वनी क्रमांक / मोबाईल क्रमांक इत्यादी तपशीलासह कृपया आयोगास पाठवावी, अशी विनंती करण्यात आली आहे.
आक्षेप का ?
एमपीएससीनेवरील पत्र मुंबई विद्यापीठाला पाठवले होते. या पत्राच्या आधारावर मुंबई विद्यापीठाने स्वतःचे पत्र तयार करून तज्ञ प्राध्यापकांची माहिती मागवली आहे. परंतु हे दोन्ही पत्र संकेतस्थळावर प्रसिद्ध करण्यात आले आहे. यामुळे संबंधित परीक्षेची प्रश्नपत्रिका मुंबई विद्यापीठातील प्राध्यापक तयार करणार ही माहिती उघड झालेली आहे. हा गोपनीय नियमांचा भंग असल्याचा आक्षेप घेतला जात आहे
