Nagpur Neha Ingole Sawale health tech app innovation uses fingernail images detect liver diseases psoriasis early | आता नखांच्या इमेजवरून आजार शोधता येणार, नेहाने ॲप तयार करून रचला इतिहास; जगभरातून पहिली…

नेहा आणि त्यांच्या टीमने सादर केलेला प्रकल्प ‘फिंगरनेल इमेजेसच्या सहाय्याने यकृत विकार व सोरायसिसचा लवकर शोध घेण्यासाठी स्मार्टफोन ॲप्लिकेशन’ हा होता.

Written by लोकसत्ता टीम

नागपूर

Updated: September 10, 2025 15:12 IST

Nagpur Neha Ingole Sawale health tech app innovation uses fingernail images detect liver diseases psoriasis early

नेहा इंगोले-साबळे यांनी क्वालालंपूर येथे झालेल्या आयईईई येसिस्ट-१२ आंतरराष्ट्रीय स्पर्धेत पहिले पारितोषिक जिंकले.(छायाचित्र:लोकसत्ता टीम)

नागपूर: नखांची निगा राखणे हे ब्युटी वा नेल सलॉनला जाण्यापेक्षा खूप जास्त महत्त्वाचे आहे. शरीराचा हा अवयव तुमच्या आरोग्याविषयीचे संकेत देतो आणि अनेक आरोग्य समस्यांची लक्षणे वेळेआधीच दर्शवतो. म्हणूनच नखांचा रंग आणि त्यात होणाऱ्या बदलांवर लक्ष ठेवणे आवश्यक आहे. नखांवर डाग पडणे किंवा इतर काही होणे हे कदाचित एखाद्या आजाराचे लक्षण असू शकते. जेव्हा असे होते तेव्हा त्वचारोगतज्ज्ञाला दाखवण्याचा सल्ला दिला जातो, जेणेकरून रक्ताची तपासणी करून आणि इतर प्रकारे डॉक्टर त्यांच्या रुग्णांची परिस्थिती समजून घेऊ शकतात. स्थिती गंभीर आहे असे जाणवले तर विशेषज्ञ बायोप्सी करण्यास सांगू शकतात.

नागपूरच्या तरुणीने जागतिक पातळीवर इतिहास रचला आहे. नेहा इंगाेले-साबळे यांनी नुकत्याच क्वालालंपूर (मलेशिया) येथे झालेल्या आयईईई येसिस्ट-१२ (युथ एन्डेव्हर्स फॉर सोशल इनोव्हेशन युजिंग सस्टेनेबल टेक्नॉलॉजी) या आंतरराष्ट्रीय स्पर्धेच्या स्पेशल ट्रॅक गटात जगभरातील स्पर्धकांना मागे टाकून पहिला क्रमांक पटकावला आहे.

नेहा इंगाेले-साबळे या रामदेवबाबा इंजिनिअरिंग कॉलेजच्या इलेक्ट्रॉनिक्स अभियांत्रिकी विभागातील संशोधन विद्यार्थिनी आहेत. ही प्रतिष्ठेची स्पर्धा क्वालालंपूर येथे २४ ऑगस्ट २०२५ रोजी झाली. यंदा या स्पर्धेत ८ देशांतील ५०८ संघांनी आपले प्रकल्प सादर केले. प्रकल्पांमधून निवडलेल्या केवळ ३६ संघांना अंतिम फेरीत संधी मिळाली. जगभरातील ९ देशांतील १८ तज्ज्ञ परीक्षक मंडळाने मूल्यांकन केले. त्यात नेहाचा प्रकल्प ठळक ठरला आणि जागतिक विजेतेपद पटकावले. नेहाच्या या अद्वितीय यशाबद्दल त्यांना १,००० अमेरिकन डॉलर्सचे पारितोषिक देऊन सन्मानित करण्यात आले. त्यांच्या संशोधन प्रवासात डॉ. रिचा खंडेलवाल यांनी मार्गदर्शन केले. नेहा या विद्यापीठात कार्यरत असलेल्या सुनील इंगोले यांच्या कन्या व एका बहुराष्ट्रीय कंपनीत कार्यरत प्रताप साबळे यांच्या पत्नी आहेत. त्यांच्या या अभूतपूर्व यशामुळे नागपूर, महाराष्ट्र आणि भारताचाही मान जगभर उंचावला आहे.

हेही वाचा

VIDEO: ग्रामीण भागातील नऊ वर्षांची सिद्दी ‘रॅपलिंग’ स्टार; अवघड डोंगर, कडे, शिखरे पादाक्रांत

यकृताचे विकारही शोधणार

नेहा आणि त्यांच्या टीमने सादर केलेला प्रकल्प ‘फिंगरनेल इमेजेसच्या सहाय्याने यकृत विकार व सोरायसिसचा लवकर शोध घेण्यासाठी स्मार्टफोन ॲप्लिकेशन’ हा होता. हा अभिनव प्रकल्प पूर्णतः नॉन-इन्व्हेसिव्ह, पोर्टेबल व परवडणारा असून ग्रामीण भागात आरोग्यसेवा अधिक परिणामकारक करण्यासाठी क्रांतिकारक ठरणार आहे. संयुक्त राष्ट्रांच्या ‘शाश्वत विकास उद्दिष्ट क्र. ३ – सर्वांसाठी चांगले आरोग्य व कल्याण’ याला हा प्रकल्प थेट हातभार लावतो.