नागपूर: सेतूबंधन प्रकल्पाअंतर्गत रेल्वे उड्डाणपुलाचे काम; छत्तीसगडला जाणारी गाडी १७, १८ ऑगस्टला रद्द

दक्षिण-पूर्व-मध्य रेल्वेच्या नागपूर विभागाअंतर्गंत गोंदिया ते गंगाझरी सेक्शनमध्ये एका रेल्वे क्रॉसिंगवर रेल्वे उड्डाणपूल उभारण्यात येत आहे. उड्डाणपुलाचे गर्डर टाकण्याचे काम केले जाणार आहे. त्यासाठी रेल्वे मेगा ब्लॉक घेण्याचे ठरवले असून १७ ऑगस्टला रात्री १०.३० वाजता पासून १८ ऑगस्टला रात्री १२.३० वाजेपर्यंत नागपूर-हावडा मार्गावरील अप, डाऊन आणि तिसरी मार्गिका वाहतुकीसाठी बंद राहणार आहे. त्यामुळे रायपूर-इतवारी (नागपूर) पॅसेंजर गाडी १७ ऑगस्टला आणि इतवारी ते रायपूर पॅसेंजर गाडी १८ ऑगस्टला रद्द करण्यात आली आहे.

दरम्यान, नागपूर भौगोलिकदृष्ट्या देशाच्या मध्यभागी असल्याने नागपूरमार्गे देशाच्या चारही दिशांना जाणाऱ्या रेल्वेगाड्यांची संख्या मोठी आहे. शिवाय मध्य भारतात खनिज साठे असल्याने आणि ते समुद्रापर्यंत पोहोचवण्यासाठी रेल्वेची तिसरी आणि चौवथी मार्गिका टाकण्यात येत आहे. नागपूर ते इटारसी, सेवाग्राम ते बल्लारशा आणि नागपूर राजनांदगाव तिसरी रेल्वे मार्गिका टाकण्यात आली आहे. आता नागपूर ते इटारसी आणि सेवाग्राम ते बल्लारशा चौवथी मार्गिका मंजूर झाली आहे.

नागपूर- वर्धा तिसरी लाईन ची खूप वर्षापूर्वी घोषणा केली गेली होती. कालांतराने गरजेनुसार येथे चौथी लाईनही घोषित करण्यात आली. सध्या या ७८ किमी मार्गाचे ३४ किमीचे काम पूर्ण झाले आहे. नागपूर ते वर्धा दरम्यान दररोज मोठ्या संख्येने गाड्या धावतात. अशा परिस्थितीत येथे दोन लाईन पुरेशा नाहीत. त्यामुळे तिसरी आणि चौथी लाईन बनविण्याची घोषणा करण्यात आली आहे.