चंद्रपूर : ताडोबा-अंधारी व्याघ्र प्रकल्पाचे प्रवेश शुल्क सर्वसामान्य नागरिकांच्या आवाक्याबाहेर आहे. विशेषतः शनिवार-रविवारसाठी कोर झोनमधील तब्बल १२,६०० चे शुल्क स्थानिक लोकांसाठी ताडोबा दर्शन केवळ एक ‘स्वप्न’ बनवत आहे. ताडोबाची व्याघ्र सफारी आता केवळ गर्भश्रीमंतांची ओळख बनून राहिली आहे. तेव्हा गरीब आणि सर्वसामान्यांनी व्याघ्र सफारी करू नये का, त्यांनी जंगलात जावून वाघ बघूच नये का असा प्रश्न उपस्थित करित तातडीने शुल्क कमी करा अन्यथा १ ऑक्टोबरपासून तीव्र आंदोलनाचा इशारा देणारे खरमरीत पत्र कॉग्रेस खासदार प्रतिभा धानोरकर यांनी वनमंत्री गणेश नाईक यांना लिहिले आहे. दरम्यान ताडोबाचे शुल्क सातत्याने वाढत असतांना माजी वनमंत्री सुधीर मुनगंटीवार यांच्यासह भाजपाचे सर्व लोकप्रतिनिधी मुग गिळून गप्प बसले आहेत.
ताडोबा अंधारी व्याघ्र प्रकल्पाकडे जगातील पर्यटक आकर्षित झाला आहे. ताडाेबा प्रकल्पातील वाघ, बिबट तसेच इतर वन्यप्राण्यांमुळेच पर्यटक येथे येत आहेत. मात्र ताडोबा व्यवस्थापनाने व्याघ्र सफारीत भरमसाठ वाढ केली आहे. त्यामुळे ताडोबातील व्याघ्र सफारी ही गरीब, मध्यमवर्गीय आणि सर्वसामान्यांच्या अवाक्याबाहेरची झाली आहे. त्याचा परिणाम चंद्रपूर जिल्ह्यातील नागरिकांमध्ये तीव्र असंतोष पसरला आहे. विशेषतः शनिवार-रविवारसाठी कोर झोनमधील तब्बल १२ हजर ६०० चे शुल्क स्थानिक लोकांसाठी ताडोबा दर्शन केवळ एक ‘स्वप्न’ बनवत आहे. याच पार्श्वभूमीवर, जिल्ह्याच्या खासदार प्रतिभा धानोरकर यांनी वनमंत्री गणेश नाईक यांना कठोर भाषेत पत्र लिहून तातडीने शुल्क कपातीची मागणी केली आहे.
चंद्रपूर जिल्ह्यात मोठ्या प्रमाणात मानव-वन्यजीव संघर्ष आहे. नागरिक वाघांच्या हल्ल्यांमुळे जीव गमावत असताना, त्याच जिल्ह्यातील लोकांना वाघाचे दर्शन घेण्यासाठी हजारो रुपये मोजावे लागत आहेत. हा दुजाभाव त्वरित थांबवावा, अशी मागणी केली आहे. वाघाच्या हल्ल्यात जीव स्थानिकांनी गमवायचा आणि पैसे खर्च करून जिप्सीत बसून व्याघ्र सफारी बाहेरच्या पर्यटकांनी आनंदाने करायची, वाघ आम्ही वाचवायचे प्रसंगी आम्ही जीव द्यायचा, मात्र आमच्या जीवावर देशविदेशातील पर्यटकांनी मौज करायची हा कुठला न्याय असाही प्रश्न उपस्थित केला आहे.
ताडोबा व्यवस्थापनाने ताडोबा कोर झोनसाठी सोमवार ते शुक्रवार ८ हजार ६०० रूपये शुल्क जाहीर केले आहे. तर शनिवार आणि रविवारसाठी कोर झोन सफज्ञरी १२ हजार ६०० रूपये आहे, ताडोबा बफर सफारी सोमवार ते शुक्रवार ७ हजार ३०० रूपये आणि शनिवार व रविवार साठी १० हजार ३०० रूपये आहे. विशेष म्हणजे हा केवळ सफारचा खर्च आहे. रिसोर्ट, हॉटेल, खाणे, पिणे आणि इतर सर्व खर्च हा वेगळा आहे. हा संपूर्ण खर्च सामान्यांच्या अवाक्याबाहेरचा आहे. “स्थानिक नागरिकांना ताडोबा सफारी किमान २७०० रूपये वाहन शुल्क आणि ६०० रूपये प्रति व्यक्ती शुल्क आकारले जावे. ताडोबामुळे चंद्रपूरची ओळख आहे, पण आज ताडोबा येथील लोकांनाच परका झाला आहे. हा अन्याय आम्ही कदापि सहन करणार नाही.” असाही इशारा धानोरकर यांनी दिला आहे.
१ ऑक्टोबरपासून ‘जिप्सी प्रवेश बंद’ आंदोलनाचा इशारा
खासदार प्रतिभा धानोरकर यांनी वनमंत्र्यांना स्पष्ट आणि अंतिम इशारा दिला आहे की, जर १ ऑक्टोबरपासून सुरू होणाऱ्या नवीन पर्यटन हंगामापूर्वी स्थानिक नागरिकांसाठी शुल्क कपातीचा निर्णय लागू झाला नाही, तर १ ऑक्टोबर रोजी ताडोबात एकही जिप्सी आत जाऊ दिली जाणार नाही. हा इशारा केवळ एक मागणी नसून, चंद्रपूरच्या नागरिकांच्या हक्कांसाठी उभारलेले हे मोठे आणि निर्णायक आंदोलन असेल, असे खासदार प्रतिभा धानोरकर यांनी ठामपणे सांगितले आहे. शासनाने या गंभीर विषयावर तातडीने लक्ष देऊन स्थानिकांना न्याय द्यावा, अशी तीव्र अपेक्षा व्यक्त होत आहे.
