यवतमाळ : बॉलिवूडमध्ये काम करून यशस्वी होण्याचे अनेकांचे स्वप्न असते. बहुतांश तरुण, तरुणी बॉलिवूडमध्ये अभिनेता, अभिनेत्री होण्यासाठी प्रयत्न करतात. मात्र अभिनयाच्या क्षेत्राशिवाय बॉलिवूडमध्ये अनेक क्षेत्रात यश मिळवून प्रसिद्धीही मिळवता येते. त्याच दृष्टीने प्रयत्न करत अमरावती माहेर आणि यवतमाळ सासर असलेल्या सायली अजिंक्य सोनटक्के या तरुणीने फॅशन कॉस्ट्यूम डिझायनर म्हणून बॉलिवूडमध्ये आपला वेगळा ठसा उमटवला आहे.
येथील सुप्रसिद्ध नटराज संगीत कला अकादमीचे डॉ. किशोर सोनटक्के यांची सून आणि अमरावतीचे माहेर असलेली सायली अजिंक्य सोनटक्के-ठाकरे यांनी चंदेरी दुनियेत फॅशन क्षेत्रात आपली स्वतंत्र ओळख निर्माण केली आहे. सायली ठाकरे आज बॉलीवूडमधील आघाडीच्या टॉप कॉस्ट्यूम डिझायनर म्हणून ओळखल्या जात आहेत. सध्या त्या बॉलीवूडचे नामांकित फॅशन डिझायनर मनीष मल्होत्रा यांच्यासोबत कार्यरत आहेत. प्रख्यात संगीतकार ए.आर. रहमान यांचे शिष्य बॉलीवूड युवा संगीतकार, गायक, अजिंक्य सोनटक्के यांच्या सायली या पत्नी आहेत. त्यामुळे यवतमाळच्या या कर्तबगार सुनेवर अनेकांनी अभिनंदनाचा वर्षाव केला आहे.
धर्मा प्रोडक्शनच्या आत्ताच रिलीज झालेल्या “सनी संस्कारी की तुलसी कुमारी” या चित्रपटातील प्रसिद्ध नायीका जान्हवी कपूर व सानिया मल्होत्रा यांचे सायली ठाकरे यांनी कॉस्ट्यूम डिझाईन केले आहेत चंदेरी दुनियेत अतिशय अल्पकाळात कॉस्ट्यूम डिझायनर म्हणून प्रसिद्धीस आलेल्या सायलीने सुमारे पन्नासच्या वर चित्रपटात ही जबाबदारी लीलया पार पाडून आपली एक स्वतंत्र ओळख निर्माण केली आहे.
सायलीने बॉलीवूड मध्ये अनेक मोठ्या चित्रपटांसाठी कॉस्ट्यूम डिझाईन केले आहेत. त्यात “रॉकी और राणी कि प्रेम कहानी”, सर्कस, अतरंगी रे, गेम चेंजर, परम सुंदरी, या चित्रपटांचा विशेष उल्लेख करता येईल. सायली यांनी विविध चित्रपट, गाणी, चित्रपट इव्हेंट कार्यक्रमांसाठी बॉलीवूड मधील अनेक दिग्गज अभिनेत्रींचे कॉस्ट्यूम डिझाईन केले आहे. त्यामध्ये क्रिती सेनन, आलिया भट, सारा अली खान, कॅटरिना कैफ, अनन्या पांडे, जान्हवी कपूर, सानिया मल्होत्रा, शिल्पा शेट्टी, रेखा, कियारा अडवाणी, जॅकलीन फर्नांडिस, काजोल, जया बच्चन, झीनत अमान, सोनम वाजवा, फातिमा सना शेख, राधिका आपटे, आणि मानुषी छिल्लर यांचा समावेश आहे.
प्रसिद्ध उद्योगपती नीता मुकेश अंबानी कल्चरल सेंटरच्या उद्घाटन प्रसंगी त्यांचे वेशभूषा व स्टायलिंगचे काम सायलीने केले आहे. सध्या त्या “गुस्ताख इश्क”, “साली मोहब्बत,”आणि “पती पत्नी और वो दोनो”या आगामी बॉलीवूड चित्रपटांसाठी कॉस्ट्यूम डिझाईन करत आहेत.
