नाशिक पूर्व मतदार संघातील मनसे उमेदवाराविरुध्द गुन्हा, पक्ष सचिवाच्या घरात लूट

नाशिक : विधानसभा निवडणुकीत निवडणूक खर्च सादर न केल्याच्या कारणावरून नाशिक पूर्व मतदार संघातील मनसेच्या उमेदवाराने आपल्याच पक्षाच्या जिल्हा सचिवाच्या घरातून नऊ लाखांहून अधिक रुपये दमदाटी करुन नेले. या प्रकरणी आडगाव पोलीस ठाण्यात मनसेचे उमेदवार प्रसाद सानप आणि त्यांच्या साथीदारांविरुध्द गुन्हा दाखल करण्यात आला आहे.

मनसेचे जिल्हा सचिव योगेश पाटील यांनी आडगाव पोलीस ठाण्यात सानपविरूध्द तक्रार दाखल केली आहे. प्रसाद सानप हे नाशिक पूर्व मतदार संघात मनसेचे उमेदवार आहेत. सानप यांनी पाटील यांच्यावर महानगरपालिका आणि निवडणूक आयोगाच्या परवानग्यांसंदर्भात जबाबदारी सोपवली होती. या कामाचा मोबदला म्हणून पाटील यांना काही रक्कम दिली होती. सानप यांनी पाटील यांना, मोबदला म्हणून दिलेल्या रकमेचा वापर महापालिकेडून मिळविण्यात येणाऱ्या परवानग्यांसाठी वापर करण्याची सूचना केली होती. पाटील यांनी मोबदला म्हणून मिळालेल्या रकमेचा उपयोग त्यासाठी करण्यास नकार दिला.

आणखी वाचा-नाशिक परिक्षेत्रात २५ दिवसांत ५० कोटींचा मुद्देमाल जप्त, १७ हजार गुन्हेगारांविरुध्द कारवाई

आपणास तुमचे काम करता येणार नाही. तुमचे पैसे परत देतो, असे त्यांनी सांगितले. निवडणुक खर्च सादर करण्यासाठीही ते गेले नाहीत. याचा राग आल्याने सानप आणि त्यांचे साथीदार उमाकांत एगडे, नितीन घुगे, संकेत मोहिते हे पाटील यांच्या घरी गेले. निवडणुकीचा खर्च का सादर केला नाही, असा प्रश्न करीत पैसे परत करण्याची मागणी केली. पैसे आणण्यासाठी पाटील हे आतील खोलीत गेले असता संशयितांनी त्यांच्या पाठोपाठ जात आठ लाख ८४ हजार रुपयांची रोकड आणि पाटील यांच्या आईची ७५ हजार रुपयांची सोन्याची पोत असा नऊ लाख ५९ हजार रुपयांचा मुद्देमाल बळजबरीने हिसकावून नेला. घरातील आधार कार्ड, पॅनकार्ड, डेबिट कार्डही घेऊन गेले. याप्रकरणी आडगांव पोलीस ठाण्यात गुन्हा दाखल करण्यात आला आहे.