बिबट्याच्या हल्लात वयोवृद्ध महिलेचा मृत्यू; जळगावमधील खळबळजनक घटना

देवगाव येथील इंदुबाई वसंत पाटील (७३) सोमवारी दुपारी १२.३० वाजण्याच्या सुमारास नेहमीप्रमाणे स्वतःच्या शेतात काम करत होत्या. आजुबाजुला कोणी नसल्याचे लक्षात घेऊन लपून बसलेल्या एका बिबट्याने अचानक त्यांच्यावर हल्ला चढवला. बिबट्याने डोक्यावर तसेच चेहऱ्यावर खोल जखमा केल्यामुळे त्या गंभीर जखमी झाल्या.

दुर्दैवाने घटनास्थळी त्यांच्या जवळपास कोणीही नसल्याने त्या जखमी अवस्थेत तशाच शेतातच बराच वेळ पडून राहिल्या. दुसऱ्या एका शेतात काम करणारे बाळू पाटील आणि रमेश सोनवणे यांना काही वेळाने इंदूबाई जखमी अवस्थेत जमिनीवर पडून असल्याचे लक्षात आले. त्यांनी तत्काळ देवगावचे पोलीस पाटील न इतर ग्रामस्थांना घटनेची माहिती दिली.

पोलीस पाटील आणि इतर ग्रामस्थांनी घटनेची माहिती मिळताच तातडीने घटनास्थळी धाव घेतली. तेव्हा त्यांना इंदूबाई पाटील यांच्या जवळ बिबट्याच्या पावलांचे ठसे आढळून आले. तातडीने जळगाव तालुका पोलिसांना आणि वन विभागाला घटनेबाबत कळविण्यात आले. दरम्यान, बिबट्याने वयोवृद्ध महिलेवर हल्ला केल्याचे समजताच तालुका पोलीस ठाण्याचे अधिकारी आणि कर्मचारी तसेच वन विभागाचे अधिकारी नितीन बोरकर घटनास्थळी दाखल झाले. त्यांनी पंचनामा करून इंदुबाई पाटील यांना उपचारासाठी तातडीने जळगाव येथील शासकीय वैद्यकीय महाविद्यालयाच्या रुग्णालयात दाखल करण्याची कार्यवाही केली. मात्र, डॉक्टरांनी तपासणी करून त्यांना मृत घोषित केले.

या घटनेमुळे देवगावसह परिसरात भीतीचे वातावरण पसरले आहे. वन विभागाने तत्काळ नरभक्षक बिबट्याचा शोध घेऊन त्याला जेरबंद करावे, अशी मागणी ग्रामस्थांकडून करण्यात आली. जिल्ह्यात यावल तालुक्यातील साकळी-मनवेल शिवारातही सहा मार्च रोजी आणि डांभुर्णी शिवारात १५ एप्रिल रोजी घडलेल्या बिबट्याच्या हल्ल्यात अनुक्रमे सात वर्षीय केशव बारेला आणि दोन वर्षीय रत्ना ठेलारी या दोन बालकांचा दुर्दैवी मृत्यू झाला होता.

दोन्ही घटना घडल्यानंतर पीडित कुटुंबांना शासनाकडून तातडीची आर्थिक मदत मिळावी, यासाठी आमदार चंद्रकांत सोनवणे यांनी सातत्याने पाठपुरावा केला. शासनाने प्रत्येकी २५ लाख रुपयांची मदत मंजूर केल्यावर ती थेट पीडित कुटुंबांच्या हाती सोपवण्यात आली. ज्यामुळे बालके गमावलेल्या कुटुंबांना काहीअंशी दिलासा मिळाला होता.