जळगाव : जिल्ह्यात स्थानिक स्वराज्य संस्थांच्या निवडणुकांचे वेध लागल्यानंतर भाजपसह अजित पवार गटाने यापूर्वीच अनेक दिग्गजांचे प्रवेश घडवून आणले आहेत. त्यानंतर आता शिवसेनेने (एकनाथ शिंदे) काही माजी आमदारांच्या प्रवेशाचे संकेत दिले आहेत. त्यात अमळनेरमधील भाजपचे माजी आमदार शिरीष चौधरी यांचाही समावेश असल्याची चर्चा आहे.
जिल्ह्यात विधानसभेच्या निवडणुकीत ११ पैकी प्रत्येकी पाच मतदारसंघातील जागा जिंकून भाजपसह शिवसेनेने (एकनाथ शिंदे) आपले वर्चस्व सिद्ध केले असले, तरी जेवढ्या काही ठिकाणी शिंदे गटाचे सध्या वर्चस्व आहे तिथे भाजपने आपली माणसे पेरण्यास सुरूवात केली आहे. शिंदे गटाच्या विरोधात निवडणूक लढणाऱ्या उमेदवारांना भाजपमध्ये प्रवेश देण्यावर भर दिला आहे. या पार्श्वभूमीवर, शिंदे गटानेही आता शांत न बसता भाजपला धक्का देण्याच्या दिशेने महत्वाचे पाऊल टाकल्याचे बोलले जात आहे. त्यासाठी अमळेरमधील भाजप समर्थक माजी आमदार शिरीष चौधरी यांनी आपल्या पक्षात घेण्याच्या हालचाली देखील सुरू वाढविल्या आहेत.
चौधरी हे मुख्यमंत्री देवेंद्र फडणवीस यांचे निकटवर्तीय मानले जातात. २०१४ मध्ये पहिल्यांदा अमळनेरमधून अपक्ष निवडणूक लढवून विजयी झाल्यानंतर चौधरी यांनी भाजपला पाठिंबा दिला होता. त्यामुळे २०१९ च्या निवडणुकीत भाजपने त्यांना पक्षाची अधिकृत उमेदवारी दिली. परंतु, राष्ट्रवादीचे उमेदवार अनिल पाटील यांनी त्यांचा त्यावेळी पराभव केला होता.
२०२४ च्या निवडणुकीत अमळनेरची जागा अजित पवार गटाला सोडण्यात आल्याने चौधरी यांनी अपक्ष उमेदवारी केली. परंतु, यावेळीही त्यांना पराभव पत्करावा लागला. दरम्यान, महायुतीच्या उमेदवाराला आव्हान दिल्यानंतर माजी आमदार चौधरी भाजपपासून काही दिवस लांब गेले होते. मुख्यमंत्री फडणवीस फेब्रुवारीत जळगाव दौऱ्यावर आले असता, त्यांची भेट घेऊन चौधरी यांनी मनोमिलनाचा प्रयत्न करून पाहिला. परंतु, भाजपकडून त्यांना म्हणावा तसा प्रतिसाद मिळाला नाही. त्यामुळे त्यांनी शिंदे गटात प्रवेश करण्याचे आता निश्चित केल्याचे बोलले जात आहे.
दरम्यान, अमळेरमध्ये एका शैक्षणिक संस्थेच्या कार्यक्रमानिमित्त उपस्थित राहिल्यानंतर पालकमंत्री पाटील यांनी माजी आमदार चौधरी यांच्या कार्यालयास शनिवारी आवर्जून भेट दिली. त्यांच्याशी पक्ष प्रवेशासह नगर परिषदेच्या आगामी निवडणुकीत शिंदे गटाचे वर्चस्व वाढविण्याच्या दृष्टीने चर्चा केल्याचे सांगितले जाते. चौधरी यांचा पक्ष प्रवेश जळगावमधील मेळाव्यात होणार होता. मात्र, ऐनवेळी पक्षाचे नेते उपमुख्यमंत्री एकनाथ शिंदे यांचे दोन वेळा दौरे रद्द झाल्याने तो होऊ शकला नाही. दिवाळीनंतर शिंदेंचा दौरा आणि चौधरी यांच्या पक्ष प्रवेशाचे फटाके फुटण्याची शक्यता आता व्यक्त होत आहे.
मंत्री गुलाबराव पाटील यांच्या भेटीदरम्यान आगामी स्थानिक स्वराज्य संस्थेच्या निवडणुकीबाबत सखोल चर्चा झाली. पुढील राजकीय रणनीती आणि संघटनात्मक बळकटीबाबतही विचारमंथन झाले.-शिरीष चौधरी (माजी आमदार, अमळनेर)
