“लोक काम घेऊन येतात, हो म्हणायला काय लागतं…”, मंत्री गुलाबराव पाटील यांचे वक्तव्य !

शासन आणि प्रशासन ही दोन चाके मानली जातात. काम होईल की नाही होईल माहिती नाही, पण आलेल्या प्रत्येकाचे स्वागत करा. अर्धे काम तिथेच होऊन जाते. जळगावचे जिल्हाधिकारी नेहमी तेच करतात. कोणीही आला की त्याचे जोरात स्वागत केल्याने त्यांच्याकडे काम घेऊन आलेल्या व्यक्तीच्या लक्षातही राहत नाही की तो काय विषय घेऊन आला होता. ही एक आयडिया असते प्रत्येकाची. मला वाटते अधिकारी आणि पदाधिकाऱ्यांचे त्यांच्याकडे काम घेऊन आलेल्या प्रत्येक नागरिकाचे समाधान करणे खरे कर्तव्य आहे. आमच्याकडे तर काही लोक असे काम घेऊन येतात की तुम्ही कल्पना करू शकत नाही. पण आम्ही कधीच नाही म्हणत नाही. हो म्हणायला काय लागतं, अशी मिश्किल टिप्पणी पालकमंत्री पाटील यांनी केली.

जळगाव जिल्हाधिकाऱ्यांकडे एक कर्मचारी आहे, त्याचे नाव मी सांगणार नाही. तो त्यांचा सर्वात खास प्रशासकीय अधिकारी आहे. कोणतेही क्लिष्ट प्रकरण आल्यावर त्याच्याकडे पाठवून दिले जाते. म्हणजे त्यांचे अर्धे काम संपते. हाताखालच्या कर्मचाऱ्यांना हाताळणे सुद्धा सोपे आहे, ते अधिकाऱ्यांना जमले पाहिजे. कायम तणावमुक्त राहा. नोकरीवाले आणि आम्ही पुढारी फार ताण घेतो. कशाला ताण घ्यायचा. जे तुमच्या प्रारब्धात आहे, त्याला कोणीच चुकवू शकत नाही. तुम्ही आता शासनाचे नोकर नाही तर जनतेचे सेवक आहात. त्यानुसार जनतेची सेवा करा, असा सल्ला मंत्री पाटील यांनी नवनियुक्त कर्मचाऱ्यांना दिला. एखादा गरजू तुमच्यापर्यंत आला आणि त्याचे अश्रू तुम्ही पुसले तर त्यासारखे दुसरे समाधान नाही.आमचे दुकान त्याच्यावरच चालते. दिवसभरात २०-२५ गरजू लोकांची कामे केली की आमचा सगळा क्षीण निघून जातो, असेही त्यांनी नमूद केले.