जळगावात शिंदे गटाला धक्का… माजी महापौर बोगस कॉल सेंटर प्रकरणी गोत्यात…!

जळगाव-ममुराबाद या दिवस-रात्र वर्दळ असलेल्या रस्त्यालगत कोल्हे परिवाराची मोठ्या प्रमाणात शेती आहे. त्याच ठिकाणी अपर पोलीस अधीक्षक अशोक नखाते यांना शनिवारी बोगस कॉल सेंटर चालविले जात असल्याबाबतची गोपनीय माहिती मिळाली होती. त्या माहितीच्या आधारे नखाते यांनी रविवारी दुपारच्या सुमारास कोल्हे यांच्या एल.के. फार्म हाऊसवर छापा टाकला.

पोलिसांनी अचानक धाड टाकली असता, त्या ठिकाणी ३१ लॅपटॉप आणि कॉल सेंटरची आधुनिक यंत्रणा आढळून आली. पोलिसांनी केलेल्या प्राथमिक तपासणीत सदरचे कॉल सेंटर खास करून विदेशी लोकांची फसवणूक करण्यासाठी सुरू केल्याचे स्पष्ट झाले. कॉल सेंटरमधील कर्मचारी स्वतःला अधिकृत एजंट असल्याचे सांगून डेटा चेक करण्याच्या बहाण्याने किंवा इतर आकर्षक आमिषे दाखवून परदेशी नागरिकांना गंडवित होते. दोन लॅपटॉपवर पैशांचे व्यवहारही झाल्याचे पोलिसांना आढळून आले. पोलिसांनी अट केलेले संशयित हे कोलकाता येथील रहिवाशी आहेत.

दरम्यान, जळगाव पोलिसांनी चौकशीसाठी फार्म हाऊसचे मालक माजी महापौर ललित कोल्हे यांना सुद्धा ताब्यात घेतले आहे. शिंदे गटाचे नेते तथा जिल्ह्याचे पालकमंत्री गुलाबराव पाटील यांचे निकटवर्तीय मानले जाणाऱ्या कोल्हे यांच्यावर झालेल्या पोलीस कारवाईनंतर जळगावचे राजकीय वातावरण चांगलेच ढवळून निघाले आहे. आजोबा, वडील, काका यांचा राजकीय वारसा चालवित असताना कोल्हे यांनी मनसेच्या माध्यमातून सक्रीय राजकारणाची सुरूवात केली होती.

विधानसभेचा जळगाव ग्रामीण मतदारसंघ अस्तित्वात आल्यानंतरची २००९ ची पहिली निवडणूक देखील त्यांनी लढली होती. मात्र, पहिल्या प्रयत्नात अपयश आल्यानंतर त्यांनी २०१४ मध्ये जळगाव शहरातून मनसेची उमेदवारी केली. त्यावेळी त्यांच्या प्रचारासाठी राज ठाकरे यांनी जळगावात सभाही झाली होती. परंतु, कोल्हे यांचे आमदारकीचे स्वप्न काही पूर्ण झाले नाही.

आमदारकीचा नाद सोडून ललित कोल्हे यांनी नंतरच्या काळात जळगाव महापालिकेवर लक्ष केंद्रीत केले. त्यांच्या नेतृत्वाखाली मनसेचे तब्बल १२ नगरसेवक महापालिका निवडणुकीत विजयी झाले. तरीही कोल्हे २०१७ मध्ये खान्देश विकास आघाडीच्या पाठिंब्याने जळगावचे महापौर बनले. मनसेची शिडी वापरून महापौर पदापर्यंत मजल मारल्यावर २०१८ मध्ये मात्र कोल्हे यांनी काही नगरसेवकांना बरोबर घेऊन भाजपमध्ये प्रवेश केला. अर्थात, भाजपमध्येही ते जास्त दिवस थांबले नाहीत.

सध्या शिवसेनेत (एकनाथ शिंदे) सक्रीय असलेले कोल्हे हे जळगाव महापालिकेची आगामी निवडणूक लढण्याच्या तयारीत होते. तत्पूर्वीच, त्यांच्या फार्म हाऊसवर ऑनलाईन फसवणुकीच्या उद्देशाने चालविल्या जाणाऱ्या बोगस कॉल सेंटरचा पर्दाफाश झाला. काही वर्षांपूर्वीही कोल्हे यांच्या त्या वादग्रस्त फार्म हाऊसवर जुगार अड्डा चालविला जात असल्याचे उघडकीस आल्याने मोठी पोलीस कारवाई झाली होती.