मुंबई महामार्गाचे काँक्रिटीकरण : नाशिकपासून सुरुवात करण्याचा निर्णय

नाशिक – मुंबई महामार्ग उखडणे, खड्डे पडणे हे वारंवार होत असल्याने उपाययोजनांसंदर्भात उपमुख्यमंत्री अजित पवार यांच्या अध्यक्षतेखाली बैठक घेण्यात आली. बैठकीला सार्वजनिक बांधकाम मंत्री रवींद्र चव्हाण, सार्वजनिक बांधकाम ( उपक्रम) मंत्री दादा भुसे, देवयानी फरांदे, दिलीप बनकर, नितीन पवार या आमदारांसह अधिकारी उपस्थित होते.

हेही वाचा >>> संप मागे… नाशिकमध्ये प्रशासनाची शिष्टाई यशस्वी, इंधन वितरणाला बंदोबस्तात सुरुवात

यावेळी आमदार फरांदे यांनी, उत्तर महाराष्ट्रातील नागरिकांना महामार्गाने मुंबईचा प्रवास त्रासदायक झाला असल्याचे सांगितले. नाशिकहून मुंबई गाठण्यासाठी सहा ते सात तासाचा कालावधी लागतो. गोंदे ते पिंपळगाव दरम्यान महामार्ग सहापदरी असून गोंदे ते वडपे दरम्यान महामार्ग चारच पदरी असल्यामुळे त्या ठिकाणी वाहतूक खोळंबा होऊन राष्ट्रीय संपत्तीचे नुकसान होते. गोंदे ते वडपे दरम्यानही महामार्ग सहापदरी करणे आवश्यक आहे. पावसाळ्यात होणारी दुरावस्था लक्षात घेऊन संपूर्ण महामार्गाचे कॉंक्रिटीकरण करण्याची मागणी त्यांनी केली. नाशिकचे पालकमंत्री दादा भुसे यांनी लक्ष दिल्यानंतर रस्त्याच्या कामांना वेग आला असून पावसाळ्यापूर्वी सर्व कामे पूर्ण होणे गरजेचे असल्याचे नमूद केले.

हेही वाचा >>> आश्रमशाळेतील सहा विद्यार्थिनींना अन्नातून विषबाधा

राष्ट्रीय महामार्ग विकास प्राधिकरणाचे क्षेत्रिय व्यवस्थापक श्रीवास्तव यांनी नाशिक – मुंबई महामार्गाचे काँक्रिटीकरण करण्याचा प्रस्ताव असून नाशिक महानगरपालिका क्षेत्रालगत २० किलोमीटर रस्त्याचे विस्तारीकरण आणि काँक्रिटीकरण प्रस्तावित असल्याचे सांगितले. त्यासंदर्भात निविदा प्रक्रिया सुरू असल्याची माहितीही दिली. पिंपळगाव ते वडपे दरम्यान टोल कालावधीस दोन वर्षे बाकी असून या रस्त्याची देखभाल, दुरुस्ती ठेकेदाराकडे आहे. त्यांच्याकडून लवकरच या रस्त्याचे नूतनीकरण करून घेण्यात येईल, असे आश्वासन दिले.

नाशिक ते मुंबई महामार्ग दरम्यान ठाणे ते वडपे हा भाग महाराष्ट्र राज्य रस्ते विकास महामंडळाकडे (एमएसआरडीसी) असून या रस्त्याचे काम वेगाने सुरू आहे. ज्या ठिकाणी सातत्याने वाहतूक कोंडी होते, अशा ठिकाणी भुयारी मार्ग, उड्डाणपूल बांधण्याचे काम सुरू असून उर्वरित रस्ता आठपदरी केला जात आहे. सदर काम चार महिन्याच्या कालावधीत पूर्ण करण्याचे आदेश दादा भुसे यांनी दिले.