झुलेलाल भगवान बद्दल बेताल वक्तव्य : सिंधी समाजाचा मोर्चा

निवेदनात नमूद करण्यात आले आहे की, अमित बघेल यांनी समाज माध्यमांवर सिंधी समाजाबद्दल अपमानकारक विधान केले.यामुळे संपूर्ण सिंधी समाजाच्या धार्मिक आणि सामाजिक भावनांना ठेच पोहोचली आहे. त्यांच्या या वक्तव्यामुळे सामाजिक सलोखा धोक्यात आला असून समाजात तणाव निर्माण होण्याची शक्यता आहे. त्यांच्या या वक्तव्यामुळे केवळ एका व्यक्तीचा नव्हे, तर संपूर्ण हिंदू सिंधी समाजाचा सन्मान आणि श्रद्धास्थानांचा अपमान झाला आहे.

यावेळी शिष्टमंडळाने जिल्हा प्रशासनाला दिलेल्या निवेदनात बघेल यांच्या विरोधात भारतीय दंड संहिता कलम १५३(अ) (धर्मांमध्ये वैर निर्माण करणे), कलम २९५(अ) (धार्मिक भावना दुखावणे) आणि कलम ५०५(२) (सार्वजनिक द्वेष पसरविणे) अंतर्गत कठोर कारवाईची मागणी केली आहे. तसेच अकिल बघेल यांनी आपल्या वक्तव्याबद्दल बिनशर्त सार्वजनिक माफी मागावी, अशीही मागणी यावेळी करण्यात आली.

सिंधी समाजसेवा संस्थेचे अध्यक्ष प्रकाश श्रीचंद माधवानी यांनी दिलेल्या माहितीनुसार अमित बघेल यांनी केलेल्या अशा वक्तव्यांमुळे समाजातील बंधुत्व आणि एकोपा धोक्यात येण्याची शक्यता आहे. या अनुषंगाने आम्ही या प्रकाराचा तीव्र निषेध करतो आणि सरकारने तत्काळ कारवाई करून दोषींना शिक्षा द्यावी अशी मागणी केली आहे.भविष्यात अशा घटनांची पुनरावृत्ती होऊ नये म्हणून स्पष्ट धोरण आखावे आणि सिंधी समाजाच्या सुरक्षेसाठी आवश्यक उपाययोजना कराव्यात.धुळे जिल्ह्यातील सिंधी समाजाने प्रशासनाला आवाहन केले आहे की, धार्मिक सौहार्द अबाधित ठेवण्यासाठी आणि समाजातील शांतता टिकवण्यासाठी त्वरित कारवाई करण्यात यावी. या प्रकरणाचा गांभीर्याने विचार करून न्याय मिळवून देणे आवश्यक असल्याचे निवेदनात नमूद करण्यात आले आहे.

प्रकाश वाधवानी, किशोर लुंड,भूषण कटारिया, मोतीलाल तोलानी, संतोष दोदानी,येंशीराम चंदानी, डॉ.संतोष खत्री,तुलसी रिझवानी, तनुकुमार दुसेजा, कमल लुंड,अजय रोहिडा, हितेश रोहिडा,सुरेश दंडवाणी, अनिल पोपटानी,मनीष लुंड, कुंदनदास ठाकवानी, भागचंद तोलानी,रिकी गलानी, सुनील हसानी, रोहन खत्री आणि प्रेम कुंदनाणी यांचा या शिष्टमंडळात समावेश आहे.