Dahi Handi 2025 Celebration / जळगाव : रोप मल्लखांब… चित्तथरारक कसरती… सांस्कृतिक नृत्य आदी कार्यक्रमातून युवतींनी श्रीकृष्ण जन्माष्टमीचा आनंद द्विगणित केला. शौर्यवीर, पेशवा, वज्रनाथ ढोल पथकातील ४१५ वादकांनी संपूर्ण परिसर दणाणून सोडला. उत्तर महाराष्ट्रातील एकमेव युवतींची ही दहीहंडी फोडण्याचा मान हरिजन कन्या छात्रालयाच्या पथकाने मिळवला. त्यांना विशेष पारितोषिकाने गौरविण्यात आले.
भवरलाल ॲण्ड कांताबाई जैन फाऊंडेशन आणि युवाशक्ती फाऊंडेशनतर्फे (कै.) बॅरिस्टर निकम चौक मैदानावर (सागर पार्क) युवतींच्या दहीहंडीचे आयोजन शनिवारी सायंकाळी केले होते. यावेळी खासदार स्मिता वाघ, आमदार सुरेश भोळे, जैन इरिगेशनचे अध्यक्ष अशोक जैन आणि ज्योती जैन, जिल्हा परिषदेच्या मुख्य कार्यकारी अधिकारी मिनल करनवाल, पोलीस अधीक्षक डॉ. महेश्वर रेड्डी आणि ऐश्वर्या रेड्डी, अप्पर पोलीस अधीक्षक अशोक नखाते, उपविभागीय पोलीस अधिकारी संदीप गावित, अग्रणी बँकेचे व्यवस्थापक सुनील दोहरे, शिंदे गटाचे जिल्हा प्रमुख माजी महापौर विष्णू भंगाळे, गोदावरी फाऊंडेशनच्या डॉ. केतकी पाटील, युवती दहिहंडी समितीच्या अध्यक्ष डॉ. कल्याणी नागूलकर, प्रा.शमा सराफ, निलम जोशी, अनिता पाटील, यामिनी कुळकर्णी, सोनाली महाजन, चेतना नन्नवरे, लिना पवार, डॉ. हेमांक्षी वानखेडे, श्रीया कोकटा यांच्यासह पदाधिकारी उपस्थित होते.
मान्यवरांच्या हस्ते सुरवातीला दहिहंडीचे पूजन करण्यात आले. महाराष्ट्रात एकमेव मानली जाणारी युवतींची दहीहंडी गेल्या १७ वर्षांपासून जळगावात आयोजित केली जात आहे. यंदाही सागर पार्क झालेल्या दहीहंडी उत्सवासाठी मुख्य व्यासपीठासह तीन अन्य व्यासपीठाची स्वतंत्र व्यवस्था केली होती. दहीहंडी पथकात यंदा प्रथमच ११ संघांच्या सुमारे ५०० युवतीनी सहभाग घेतला. यावेळी छाया बोरसे, मंजुषा भिडे, कामिनी धांडे, छाया चिरमाडे यांनी परीक्षक म्हणून काम पाहिले.
युवतींची दहीहंडी पाहण्यासाठी यावर्षी जळगावकरांनी प्रचंड गर्दी करुन युवतींचा उत्साह वाढवला. दहीहंडी फोडण्यासाठी यंदा प्रथमच ११ पथके दाखल झाली होती. या पथकामध्ये किडस् गुरूकुल शाळा, नुतन मराठा महाविद्यालय, मूळजी जेठा महाविद्यालय, ॲड एस. ए. बाहेती महाविद्यालय, के.सी.ई. सोसायटी मुलींचे वसतीगृह, जी. एच. रायसोनी महाविद्यालय, हरिजन कन्या छात्रालय, के. के. इन्स्टीट्युट ऑफ योगा, एकलव्य क्रीडा संकुल, आर. आर. शाळा, एन.सी.सी. या पथकांचा समावेश होता. दहिहंडी फोडणाऱ्या युवतींच्या पथकाला चषकाने सन्मानित करण्यात आले. यासोबतच इतर सहभागी झालेल्या संघाना सुद्धा गौरविण्यात आले.
विशेष म्हणजे अहिल्यादेवी होळकर यांच्या जनशताब्दी निमित्त कर्तृत्ववान महिलांच्या सन्मानार्थ राजेश नाईक यांच्या संकल्पेतुन खास सजावट करण्यात आली होती. सोफिया कुरेशी, व्योमा सिंग, प्रेरणा देवस्थळी, दिव्या देशमुख, दिपा मलिक, राही पाखले, टेसी थामस, वंतिका अग्रवाल, गीता गोपिनाथ यांच्या कार्यातुन प्रेरणा मिळावी यासाठी त्यांना दहिहंडीत स्थान देण्यात आले. युवाशक्ती फाऊंडेशनचे विराज कावडिया, भवरलाल ॲण्ड कांताबाई जैन फाऊंडेशनचे सहकारी यांनी यशस्वीतेसाठी सहकार्य केले. अय्याज मोहसीन यांनी सूत्र संचालन केले.
