मुंबईकडे निघालेल्या कामगार मोर्चाचा कसारा घाटात मुक्काम

शहरातील कामगार उपायुक्त कार्यालयापासून निघालेला मोर्चा पाच जूनपर्यंत मंत्रालय गाठणार आहे. नेतृत्व संघटनेचे संस्थापक अध्यक्ष प्रशांत खरात यांनी केले असून त्यांनी कंपनीविरोधात गंभीर आरोप केले आहेत. स्थानिक कामगारांची अवहेलना करून बाहेरून मजूर मागविणे, कामगारांवर मानसिक दबाव आणणे, कंत्राटी कामगारांना कामावरून कमी करणे, असे प्रकार सातत्याने केले जात आहेत. संघटनेशी संबंधित कामगारांवर वैयक्तिक आकसाने कारवाई केली जात असल्याचा आरोपही त्यांनी केला.

कंत्राटी कामगारांना कायदेशीर सुरक्षा मिळावी, स्थानिक कामगारांवर अन्याय करणाऱ्या कंपनीचे बेकायदेशीर कंत्राट रद्द करावे, कंपनीच्या ४० टक्के अतिक्रमणावर तत्काळ कारवाई करावी, अनधिकृत वाहनतळ आणि वृक्षतोडीविरुद्ध कारवाई करावी, संघटना सदस्यांना पूर्वसूचना न देता कामावरून कमी करणे थांबवावे, सर्व कामगारांना कायम करावे, आदी मागण्या करण्यात आल्या आहेत. आंदोलनात शहरातील विविध कामगार संघटना, सामाजिक कार्यकर्ते, सामान्य नागरिक मोठ्या संख्येने सहभागी झाले आहेत. प्रशासनाने मागण्यांकडे गांभीर्याने लक्ष न दिल्यास मंत्रालयाबाहेर तीव्र आंदोलन छेडले जाईल, असा इशारा देण्यात आला आहे.

मोर्चा काढणारे कंत्राटी कामगार आहेत. त्यांचा कंपनीच्या कामकाजाशी प्रत्यक्ष संबंध नाही. कंपनीत कुठलेही गैरप्रकार होत नाहीत. त्यांच्याशी याविषयी वेळोवेळी चर्चा झाली आहे. त्यांनी उलट आमच्या कामगारांना मारहाण केली आहे. याविषयी पोलीस ठाण्यात गुन्हेही दाखल आहेत. कोणाला त्रास व्हावा ही कंपनीची इच्छा नाही. मात्र दबाव आणला जात आहे. या माध्यमातुन चुकीचा संदेश जात असून कामगारांच्या हिताला बाधा येत आहे. राज्यात उद्योग का आणायचे, असा प्रश्न अशा काही घटनांमुळे पडतो. – राजेश खन्ना (मुख्य कार्यकारी अधिकारी, ट्रॅक कॉम्पोनंट्स कंपनी)