नवी मुंबई : पनवेल-सीएसएमटी मार्गावरील वाशी रेल्वे स्थानकात धावती ट्रेन पकडण्याच्या प्रयत्नात एका तरुणाचा मृत्यू झाल्याची घटना समोर आली आहे. जयेश मळेकर असे मृत तरुणाचे नाव असून, तो कामानिमित्त नवी मुंबईत आला होता.
मिळालेल्या माहितीनुसार, जयेश गुरुवारी (६ नोव्हेंबर) सायंकाळी वाशी रेल्वे स्थानकातील ४ क्रमांकाच्या फलाटावर मुंबईकडे जाणारी लोकल पकडण्यासाठी आला. तेव्हा ट्रेन सुरू झाल्याचे पाहून तो धावत गेला आणि ट्रेनमध्ये चढण्याचा प्रयत्न करत असताना तोल जाऊन खाली पडला. या घटनेत त्याच्या डोक्याला आणि शरीराच्या इतर भागांना गंभीर दुखापत झाली. उपस्थित प्रवासी आणि रेल्वे कर्मचार्‍यांनी तातडीने त्याला वाशीतील नवी मुंबई मनपा रुग्णालयात दाखल केले. मात्र, उपचारादरम्यान त्याचा मृत्यू झाला. रेल्वे पोलिसांकडून मिळालेल्या अधिकच्या माहितीनुसार, जयेश चे वय ४१ वर्षं असल्याचे सांगितले जात आहे. तर तो मूळचा मुंबई सेंट्रलचा रहिवासी असून, कामानिमित्त नवी मुंबईत आल्याची माहिती मिळाली आहे.
दरम्यान, मुंबई उपनगरीय रेल्वे मार्गांवर प्रवाशांच्या निष्काळजीपणामुळे होणाऱ्या अपघातांची मालिका कायम आहे. माहिती अधिकार कायद्याअंतर्गत मिळालेल्या माहितीनुसार, जानेवारी ते मे २०२५ या पाच महिन्यांच्या कालावधीत मुंबई उपनगरीय रेल्वे मार्गावर तब्बल ९२२ प्रवाशांचा मृत्यू झाला आहे. यापैकी ५९७ मृत्यू मध्य रेल्वेवर (मुख्य आणि हार्बर मार्गासह) नोंदवले गेले आहेत.
या अपघातांचे प्रमुख कारण म्हणजे धावत्या ट्रेनमध्ये चढणे, चालत्या गाडीतून उतरणे किंवा रेल्वे ट्रॅक ओलांडणे असल्याचे रेल्वे पोलिसांनी सांगितले. अपघात टाळण्यासाठी प्रवाशांनी रेल्वे पोलिसांनी आणि प्रशासनाने दिलेल्या नियमांचे काटेकोरपणे पालन करण्याचे आवाहन रेल्वे पोलीस व प्रशासनातर्फे करण्यात आले आहे.
