पालघरमध्ये पावसाचा जोर वाढला; भुयारी मार्ग पाण्याखाली, जनजीवन विस्कळीत

गेल्या काही दिवसांपासून उघडीप घेतलेल्या पावसाने दोन दिवसांपासून पुन्हा एकदा दमदार सुरुवात केली आहे. मधल्या काळात वाढलेल्या उष्णतेमुळे हैराण झालेल्या नागरिकांना या संततधार पावसाने काहीसा दिलासा दिला आहे. या श्रावण सरींचा आनंद घेण्यासाठी पर्यटक आणि नागरिक मोठ्या संख्येने समुद्रकिनारे, धबधबे आणि निसर्गरम्य ठिकाणी गर्दी करत आहेत.

काल रात्री नऊ वाजल्यापासून सुरू असलेल्या जोरदार पावसामुळे नवली, वेऊर, कमारे, वरखुंटी यांसारख्या गावांना जोडणारा नवली भुयारी मार्ग पूर्णपणे पाण्याखाली गेला आहे. हा मार्ग बंद झाल्यामुळे पूर्व-पश्चिमेला प्रवास करणाऱ्या नागरिकांना जवळपास अडीच ते तीन किलोमीटरचा वळसा घालून छत्रपती शिवाजी महाराज चौकातील उड्डाणपुलावरून प्रवास करावा लागत आहे, त्यामुळे नागरिकांचा मोठा वेळ वाया जात असून गैरसोय होत आहे.

नवली फाटक बंद झाल्यावर नागरिकांच्या सोयीसाठी हा भुयारी मार्ग सुरू करण्यात आला होता. मात्र, थोडा जरी पाऊस पडला तरी या मार्गात मोठ्या प्रमाणात पाणी साचते आणि अक्षरशः नाल्याचे स्वरूप येते, ज्यामुळे जीव मुठीत धरूनच प्रवास करावा लागतो. स्थानिक नागरिक वारंवार प्रशासनाकडे यावर तोडगा काढण्याची मागणी करत आहेत. अनेक वर्षांपासून सुरू असलेल्या उड्डाणपुलाच्या कामाची संथ गती देखील गैरसोयीला कारणीभूत ठरत आहे.

पादचारी आणि हलक्या वाहनांसाठी हा पूल लवकरात लवकर खुला करावा अशी मागणी नागरिक पावसाळ्यापूर्वीपासून करत आहेत. मात्र, जिल्हा प्रशासन आणि रेल्वे प्रशासन याकडे सतत दुर्लक्ष करत असल्यामुळे नागरिकांमध्ये संतापाचे वातावरण आहे. या समस्येवर तातडीने उपाययोजना न केल्यास नागरिकांना पावसाळ्यात आणखी अडचणींचा सामना करावा लागू शकतो.

सकाळनंतर पावसाचा जोर वाढला

शुक्रवार सकाळपासून पावसाची रिपरीप सुरू असून शुक्रवार सकाळी आठ वाजल्यापासून शनिवार सकाळी आठ वाजल्यापर्यंत जिल्ह्यात ३१.२ मिलिमीटर पावसाची नोंद झाली आहे. यामध्ये सर्वाधिक पाऊस वसई तालुक्यात ६७.१ मिलिमीटर, पालघर तालुक्यात ४२.३ मिलिमीटर, तलासरी तालुक्यात २७.८ मिलिमीटर तर डहाणू, जव्हार, मोखाडा व विक्रमगड तालुक्यात १४ मिलिमीटर व सर्वात कमी वाडा तालुक्यात ११ मिलिमीटर पावसाची नोंद झाली आहे. असे असले तरी शनिवार सकाळपासून मात्र पावसाने जोर धरला आहे.