अजित पवारांच्या राजीनाम्याची मागणी; महायुतीत साड्या वाटपावरून वाद, जरांगेंचे मुंडेंवरील आरोप; वाचा ५ घडामोडी…

Maharashtra Political Top News Today : उपमुख्यमंत्री अजित पवार यांच्या राजीनाम्याची मागणी, महायुतीत साड्या वाटपावरून वाद; वाचा आजच्या पाच महत्वाच्या घडामोडी....

अजित पवारांच्या राजीनाम्याची मागणी; महायुतीत साड्या वाटपावरून वाद, जरांगेंचे मुंडेंवरील आरोप; वाचा ५ घडामोडी... (छायाचित्र सोशल मीडिया)

Top 5 Political Breaking News Today : राज्यात आज दिवसभरात अनेक महत्वाच्या राजकीय घडामोडी घडल्या. १) पार्थ पवार जमीन खरेदी प्रकरणावरून मनसेने उपमुख्यमंत्री अजित पवार यांच्या राजीनाम्याची मागणी केली. २) मतांची चोरी करून सत्तेत आलेल्यांनीच जमीन चोरली मोदीजी तुम्ही यावर गप्प का आहात? असा प्रश्न राहुल गांधींनी उपस्थित केला. ३) स्थानिक स्वराज्य संस्थांच्या निवडणुकांपूर्वीच साड्या वाटपावरून महायुतीत राजकीय वाद निर्माण झाला. ४) सरकार पाठीत खंजीर खुपसत असल्याने तुम्हीही नांगर फिरवा असे आवाहन उद्धव ठाकरे यांनी शेतकऱ्यांना केले. ५) माजी मंत्री धनंजय मुंडे यांनी मला मारण्यासाठी अडीज कोटी रुपयांमध्ये सुपारी दिली असा आरोप मनोज जरांगे पाटील यांनी केला. या सर्व घडामोडी सविस्तर जाणून घेऊ…

अजित पवारांच्या राजीनाम्याची मागणी

पुण्यातील कोरेगाव पार्क येथील ४० एकर जमीन खरेदी प्रकरणावरून पार्थ पवार अडचणीत आले. या प्रकरणात १८०० कोटींची जमीन केवळ ३०० कोटींना खरेदी करून फक्त ५०० रुपयांची स्टॅम्प ड्युटी भरल्याचा गंभीर आरोप विरोधकांनी केला. याप्रकरणी पोलिसांनी तीन जणांवर गुन्हा दाखल केला असून पुढील तपासाला सुरुवात केली. पुणे पोलीस आयुक्त अमितेश कुमार यांनी आज माध्यमांशी संवाद साधताना दाखल झालेल्या गुन्ह्याची माहिती दिली. या सर्व घडामोडीनंतर आज उपमुख्यमंत्री अजित पवार यांनी मुख्यमंत्री देवेंद्र फडणवीस यांची भेट घेतली. यादरम्यान पुणे शहरात महाराष्ट्र नवनिर्माण सेनेच्या कार्यकर्त्यांनी आंदोलन केले. या आंदोलनादरम्यान अजित पवार यांच्या राजीनाम्याची मागणी करण्यात आली आहे.

राहुल गांधींची पंतप्रधान मोदींवर टीका

पार्थ पवार जमीन खरेदी प्रकरणावर नरेंद्र मोदी गप्प का आहे? असा थेट सवाल लोकसभेचे विरोधी पक्षनेते राहुल गांधी यांनी उपस्थित केला. मतांची चोरी करून सत्तेत आलेल्या सरकारची ही जमीन चोरी आहे, अशी टीकाही त्यांनी यावेळी केली. “महाराष्ट्रात दलितांसाठी राखीव असलेली १८०० कोटी रुपयांची सरकारी जमीन एका मंत्र्यांच्या मुलाच्या कंपनीला फक्त ३०० कोटी रुपयांना विकण्यात आली. तसेच त्यावरील मुद्रांक शुल्कही माफ करण्यात आले. ही एक लूट असून त्यावर कायदेशीर सूटही देण्यात आली. कितीही लुटले तरी मत चोरी करून पुन्हा ते सत्तेत परतणार आहेत. दलित आणि वंचितांचे हक्क हिरावून घेणाऱ्या त्याच लुटारूंवरच मोदींजींचे सरकार टिकले आहे,” असा टोलाही राहुल गांधी यांनी लगावला.

आणखी वाचा : Maharashtra Politics : स्थानिक स्वराज्य संस्थांच्या निवडणुकांमध्ये कोणाची कसोटी? राजकीय पक्षांसाठी काय पणाला?

साड्या वाटपावरून महायुतीत वाद

स्थानिक स्वराज्य संस्थांच्या निवडणुकीपूर्वीच हिंगोतील महायुतीत वादाची ठिगणी पडली. कळमनुरीचे शिवसेना शिंदे गटाचे आमदार संतोष बांगर यांनी हिंगोलीत भाऊबीज म्हणून वाटप केलेल्या साड्यांची विरोधकांनी होळी केली. साडी घेणाऱ्या व्यक्तीचे छायाचित्र समाज माध्यमांमध्ये टाकण्यावरून मतदारांचा अपमान केला जात असल्याचा आक्षेप भाजपाच्या नेत्यांनी घेतला. बांगर हे लोकांना कमी लेखून त्यांना हिनवण्याचा प्रयत्न करीत असल्याची टीका भाजपा नेते मुटकुळे यांनी केली. या साड्यांसाठी मटका, गुटखा, वाळू, दारूचा पैसा वापरला याची जाणीव जनतेला असल्याचा टोलाही त्यांनी लगावला. या टीकेला प्रत्युत्तर न देता बांगर यांनी मात्र भाजपाच्या काही कार्यकर्त्यांनाही शिंदे गटात प्रवेश दिला आहे. महायुतीत रंगलेल्या या वादाची संपूर्ण हिंगोली जिल्ह्यात चर्चा होत आहे.

उद्धव ठाकरेंची भाजपावर टीका

आश्वासन दिल्यानंतरही कर्जमाफी न देणारे सरकार शेतकऱ्यांच्या पाठीत खंजीर खुपसत आहे. तुम्हीही सरकारवर नांगर फिरवा असे आवाहन माजी मुख्यमंत्री उद्धव ठाकरे यांनी डोंगरकडा (हिंगोली) येथील शेतकऱ्यांना केले. अतिवृष्टीने नुकसान झालेल्या शेतकऱ्यांशी संवाद साधण्यासाठी उद्धव ठाकरे हे मराठवाडा दौऱ्यावर आहेत. आज त्यांनी कळमनुरी तालुक्यातील डोंगरकडा येथील नुकसानग्रस्त शेतकऱ्यांशी संवाद साधला. “हे सरकार रजाकारापेक्षाही वाईट वागत आहे. जोपर्यंत शेतकऱ्यांची संपूर्ण कर्जमुक्ती होत नाही, तोपर्यंत महायुतीला मत नाही. दगाबाज सरकारला तुम्ही दगा द्या. मी घरी बसून जे काम केले ते त्यांनी लोकांमध्ये फिरवून करावे. भाजपाने आम्ही सत्तेत आल्यानंतर शेतकऱ्यांचा सातबारा कोरा करू असे आश्वासन दिले होते; पण आता ते योग्य वेळी कर्जमुक्ती करू अशी भाषा सरकार वापरत आहे. त्यामुळे त्यांना सांगा की आम्हीही योग्यवेळी मतदान करू”, असे ठाकरे म्हणाले.

हेही वाचा : Who is Parth Pawar : कोण आहेत पार्थ पवार? अजित पवारांचे धाकटे पुत्र कसे अडचणीत आले?

मनोज जरांगेंचा मुंडेंवर गंभीर आरोप

माजी मंत्री धनंजय मुंडे यांनी मला मारण्यासाठी अडीज कोटी रुपयांमध्ये सुपारी दिली असा गंभीर आरोप मराठा आंदोलक मनोज जरांगे पाटील यांनी जाहीर पत्रकार परिषदेतून केला. यावेळी कांचन नावाच्या व्यक्तीचा उल्लेख करीत त्यांनी माध्यमांसमोर एक ऑडिओ क्लिपही ऐकून दाखवली. हा व्यक्ती धनंजय मुंडेंचा वैयक्तिक सहाय्यक असल्याचे जरांगे म्हणाले. त्यानंतर धनंजय मुंडेंनी जाहीर पत्रकार परिषद घेऊन जरांगेंचे सर्व आरोप फेटाळून लावले. ‘थोतांड बंद करा असे म्हणत जरांगे आणि माझी ब्रेन मॅपिंग आणि नार्को टेस्ट करा’ अशी मागणीही मुंडे यांनी केली. त्यानंतर जरांगे यांनी पुन्हा पत्रकार परिषद घेत ‘मी नार्को टेस्ट करून घ्यायला तयार आहे. उद्या मी गृह मंत्रालयात, न्यायालयात, पोलीस अधीक्षक कार्यालयात, जिल्हाधिकारी कार्यालयात जाणार आणि नार्को टेस्ट करण्यासाठी अर्ज करणार’ असे स्पष्ट केले.