बलात्काराचा गुन्हा, हनीट्रॅपचा आरोप, राजकीय नेत्यांबरोबर फोटो; महाराष्ट्राच्या राजकारणात चर्चेचा विषय ठरत असलेला प्रफुल्ल लोढा कोण?

• ​प्रफुल्ल लोढा हा जळगाव जिल्ह्यातील पहूर गावचा रहिवासी आहे. त्याने राजकीय वर्तुळात स्वतःचा प्रभाव निर्माण करण्यासाठी गेल्या काही वर्षांत ओळखी, सल्ला यांचा वापर करून एक नेटवर्क तयार केले आहे.
• तो अधूनमधून अनेक प्रतिष्ठित राजकीय नेत्यांबरोबरच्या फोटोंमध्ये दिसला आहे.
• राष्ट्रवादी काँग्रेस आणि वंचित बहुजन आघाडीबरोबरच तो मुख्यतः भाजपाशी संबंधित राहिला आहे.
• ७ जुलै रोजी साकीनाका पोलिसांनी त्याला अटक केली होती. त्याच्यावर एका अल्पवयीन मुलीला नोकरीचे आमिष दाखवून, तिच्यावर हल्ला केल्याचा आणि धमकावण्यासाठी तिचे फोटो वापरल्याचा आरोप आहे.
• तो तुरुंगात असताना १७ जुलै रोजी एमआयडीसी पोलिसांनी त्याला दुसऱ्या एका प्रकरणात ताब्यात घेतले. एका १९ वर्षीय महिलेने त्याच्याविरोधात नोकरीच्या बहाण्याने लैंगिक छळाचा आरोप केला होता.

​लोढावर दोन पॉक्सो (लैंगिक अपराधांपासून मुलांचे संरक्षण) प्रकरणे आणि बलात्कार, ब्लॅकमेल, बेकायदा पद्धतीने कैद करणे व पीडितांना धमकावण्यासाठी अश्लील सामग्री वापरल्याचे अनेक आरोप आहेत. आता पुणे पोलिसांनीही त्याच्याविरोधात बलात्काराचा गुन्हा दाखल केला आहे. मुंबई पोलिसांनी जळगाव, जामनेर व पहूर येथील लोढाच्या मालमत्तांवर छापा टाकून लॅपटॉप, पेन ड्राइव्ह आणि इतर डिजिटल उपकरणे जप्त केली आहेत.

महाराष्ट्राच्या राजकारणात त्याची चर्चा का?

हनीट्रॅपचा मुद्दा सुरुवातीला महाराष्ट्र विधानसभेत काँग्रेस आमदार व पक्षाचे माजी प्रदेशाध्यक्ष नाना पटोले यांनी उपस्थित केला होता. आयएएस अधिकारी व विद्यमान मंत्र्यांचा सहभाग असलेले हनीट्रॅप ऑपरेशन झाले होते का, हे महायुती सरकारने स्पष्ट करण्याची मागणी त्यांनी केली होती आणि आणि राज्याच्या सुरक्षेला त्याचा धोका असल्याचे म्हटले होते. मात्र, महसूलमंत्री चंद्रशेखर बावनकुळे यांनी यावर उत्तर देत गृह विभाग आणि पोलीस या प्रकरणाची चौकशी करीत असल्याचे सांगितले.

​शिवसेना (उद्धव ठाकरे) नेते राऊत यांनी दावा केला की, पक्षात फूट पडण्यापूर्वी शिवसेनेचे चार खासदार आणि डझनहून अधिक आमदारांना लोढाने व्हिडीओद्वारे अडकवले होते आणि ब्लॅकमेल केले होते. त्यांनी म्हटले, “आमदार-खासदारांवर ईडी किंवा सीबीआयचा दबाव नव्हता.” भाजपाच्या शीर्षस्थ नेत्यांशी लोढाचे जवळचे संबंध आहेत, असा आरोपही त्यांनी केला. ​

प्रफुल्ल लोढाचे गिरीश महाजनांवर आरोप

संजय राऊत यांनी जळगाव येथील प्रफुल्ल लोढा आणि मंत्री गिरीश महाजन यांचा फोटो ट्विट केला होता. जामनेरचे भाजपा आमदार गिरीश महाजन यांच्यावर लोढाने २०१९ मध्ये गैरव्यवहाराचा आरोप केला होता आणि त्यानंतर तो पक्षातून बाहेर पडला. महाजन यांनी ‘आरोग्य दूत’ नावाचा एक उपक्रम चालवला होता. या उपक्रमाचा उद्देश जळगाव भागातील रुग्णांना मुंबईत उपचार मिळण्यास मदत करणे हा होता आणि लोढादेखील त्यात सक्रियपणे सहभागी असल्याचे म्हटले जात होते. भाजपा सोडल्यानंतर तो लगेचच राष्ट्रवादी काँग्रेसमध्ये सामील झाला. अजित पवार महायुतीत सामील झाल्यानंतरही लोढा शरद पवारांबरोबर राहिला आणि पक्षाच्या बहुसंख्य आमदारांना त्याने आपल्याबरोबर आणले.

परंतु, गेल्या वर्षी ज्येष्ठ नेते एकनाथ खडसे यांच्यावरील हल्ल्यानंतर लोढा राष्ट्रवादी काँग्रेस (शरदचंद्र पवार) मधून बाहेर पडला. त्यानंतर लगेचच तो वंचित बहुजन आघाडीमध्ये सामील झाला. वंचित बहुजन आघाडीने त्याला गेल्या वर्षीच्या लोकसभा निवडणुकीसाठी तिकीटही देऊ केले होते. परंतु, तिकीट स्वीकारल्यानंतर लोढाने पाच दिवसांच्या आत आपली उमेदवारी मागे घेतली. त्यानंतर लोढाने भाजपामध्ये परत प्रवेश केला. जळगावमधील एका कार्यक्रमात त्याच्या पक्षप्रवेशादरम्यान मुख्यमंत्री देवेंद्र फडणवीसदेखील उपस्थित होते.

​लोढाशी असलेल्या आपल्या निकटतेच्या दाव्यांबाबत महाजन म्हणाले की, तो आता भाजपामध्ये नाही आणि गेल्या काही वर्षांपासून त्याने विविध पक्षांच्या नेत्यांबरोबर फोटो काढले आहेत. याचाच अर्थ लोढा त्याच्या जवळचा होता, असे नाही. ते म्हणाले, “जो फोटो प्रसारित होत आहे, तो सुमारे १० वर्षांपूर्वीचा आहे. तेव्हा लोढा भाजपामध्ये होता आणि पक्षासाठी काम करत होता; पण नंतर परिस्थिती बदलली.” लोढावरील आरोपांवर महाजन म्हणाले, “हनीट्रॅपचे दावे असोत किंवा त्याच्या मालमत्तेतील वाढीबद्दलचे संशय असोत, सर्व काही तपासादरम्यान समोर येतील.” मुख्य म्हणजे या प्रकरणाबाबत बोलताना त्यांनी पटोले आणि राऊत यांनी केलेल्या हनीट्रॅपच्या दाव्यांवरदेखील प्रश्नचिन्ह उपस्थित केले.

​खडसे यांनीही या प्रकरणात अनेक प्रश्न उपस्थित केले. ते म्हणाले, “हनीट्रॅप घोटाळ्याची चर्चा राजकीय वर्तुळात सुरू झाल्यानंतर लोढाविरोधात एफआयआर का दाखल झाला? जर लोढाचा भूतकाळ संशयास्पद होता, तर महाजन यांनी त्याला भाजपामध्ये का घेतले? जर लोढा एकेकाळी महाजन यांचा विरोधक होता, तर नंतर काय बदलले? याचा हनीट्रॅपशी संबंध आहे का? सत्य लवकरच बाहेर येईल,” असे ते म्हणाले. एमआयडीसी पोलिसांना ​लोढावरील चौकशीबद्दल विचारले असता, एका अधिकाऱ्याने सांगितले, “आम्ही आरोपीला ताब्यात घेतले आहे आणि आमची चौकशी सुरू आहे.”