कोल्हापूर : महायुतीच्या झेंड्याखाली निवडणुका लढवल्या जाणार असल्याचे युती अंतर्गत तिन्ही पक्षांचे प्रमुख नेते सांगत असले तरी कोल्हापूर जिल्ह्याच्या दक्षिण भागात भाजप समर्थक आमदारास शह देण्यासाठी दोन्ही राष्ट्रवादी काँग्रेस पक्ष एकत्रित आले आहेत. विशेष म्हणजे वैद्यकीय शिक्षण मंत्री हसन मुश्रीफ यांचे या आघाडीला पाठबळ आहे. नव्या राजकीय तडजोडी कागल, गडहिंग्लज, आजरा व चंदगड या चार तालुक्यात निर्णायक ठरू शकतात. यामुळे महायुती एकत्रित लढण्याच्या निर्णयाला कोल्हापूर जिल्ह्यात धक्का बसण्यास सुरुवात झाली असून जिल्ह्यात इतरत्रही असेच चित्र राहण्याची शक्यता आहे.
राज्यात महापालिका, जिल्हा परिषद निवडणूकीची तयारी महायुती, महाविकास आघाडी कडून सुरू झालेली आहे. कोल्हापूर जिल्ह्यात महायुती म्हणून एकत्रित निवडणूक लढवणार असल्याचे पालकमंत्री प्रकाश आबिटकर, वैद्यकीय शिक्षण मंत्री हसन मुश्रीफ, उच्च व तंत्र शिक्षण मंत्री चंद्रकांत पाटील या तिन्ही मंत्र्यांकडून सांगितले जात असले तरी जागा वाटपात गुंता वाढत चालला आहे.
चंदगड तालुक्यात तर स्थानिक स्वराज्य संस्थांच्या निवडणुकीसाठी महायुती या संकल्पनेला तडा जावू लागला आहे. विधानसभा निवडणुकीत अपक्ष म्हणून निवडून आलेले शिवाजी पाटील यांनी मुख्यमंत्री देवेंद्र फडणवीस यांच्याशी असलेल्या जवळकीच्या संबंधातून भाजपचे समर्थक आमदार म्हणून काम करण्यास सुरुवात केली आहे. त्यांचा प्रभाव रोखण्यासाठी अजित पवार राष्ट्रवादी काँग्रेसचे माजी आमदार राजेश पाटील यांनी शरद पवार राष्ट्रवादी काँग्रेसच्या माजी आमदार संध्यादेवी कुपेकर व त्यांच्या कन्या नंदिनी बाभुळकर यांनी आगामी निवडणुकीसाठी एकत्रित येण्याची तयारी निश्चित केली आहे. निम्म्या जागा वाटून घेण्याचे सूत्र त्यांचे पक्के झाले आहे. या निमित्ताने विधानसभेचे दिवंगत अध्यक्ष बाबासाहेब कुपेकर व नरसिंग पाटील हा प्रबळ गट एकत्र येण्याचे संकेत आहेत.
हसन मुश्रीफ यांच्या कागल विधानसभा मतदारसंघात येणाऱ्या गडहिंग्लज या मोठ्या नगरपालिकेमध्ये जनता दलाचे दिवंगत प्रदेशाध्यक्ष, माजी आमदार श्रीपतराव शिंदे यांच्या कन्या, माजी नगराध्यक्ष स्वाती कोरी, काँग्रेसचे विधान परिषदेचे गटनेते सतेज पाटील, जन सुराज्यशक्ती पक्षाचे संस्थापक आमदार विनय कोरे हे एकत्रित येण्याच्या हालचाली सुरू आहेत. तसे घडल्यास ही आघाडी प्रभावी ठरू शकते. या बाबी लक्षात घेऊन मंत्री मुश्रीफ यांनी आपण कोठे कमी पडू नये यासाठी अजित पवार राष्ट्रवादी काँग्रेस व शरद पवार राष्ट्रवादी काँग्रेस यांना एकत्रित आणण्याचे प्रयत्न चालवलेले आहेत. या माध्यमातून एकीकडे गडहिंग्लज मधील नव्या आघाडीला शह देतानाच चंदगड मधील आमदारांचा प्रभाव रोखण्याची खेळी मुश्रीफ यांनी चालवलेली आहे.
शिवाजी पाटील यांनी विधानसभा निवडणुकीतील त्यांचे प्रमुख प्रतिस्पर्धी दौलत अथर्व कारखान्याचे प्रमुख मानसिंग खोराटे व जिल्हा बँकेचे माजी उपाध्यक्ष, काँग्रेसकडून विधानसभा विधानसभा निवडणूक लढलेले अप्पी पाटील यांना आपल्या छावणीत जवळपास आणलेले आहे. ही नवी राजकीय शक्ती तालुक्यात ताकद दाखवण्यासाठी सज्ज झाली आहे. जिल्ह्याच्या दक्षिण भागात अशाप्रकारे महायुती आणि महाविकास आघाडी या राजकीय युती, आघाडीपेक्षा सोयीच्या आघाड्या होऊ लागल्या असल्याने एकत्रित लढण्याच्या नेत्यांची भाषा केवळ कागदावर राहिली आहे.
