राज्यात लोकसभा आणि विधानसभा एकत्र की स्वतंत्रपणे?

महाविकास आघाडीच्या नेत्यांची रविवारी राष्ट्रवादीचे अध्यक्ष शरद पवार यांच्या निवासस्थानी बैठक झाली. त्यात लोकसभा आणि विधानसभा निवडणुका एकत्र होण्याची शक्यता लक्षात घेता जागावाटपाची प्रक्रिया आतापासूनच सुरू करावी, अशी चर्चा झाली. त्यानुसार जागावाटपासाठी तीन पक्षांच्या प्रत्येकी दोन नेत्यांची समिती स्थापन करण्यात येईल. या समितीच्या माध्यमातून कोणी कोणत्या जागा लढवायच्या यावर चर्चा केली जाईल, असे विरोधी पक्षनेते अजित पवार यांनी जाहीर केले.

हेही वाचा – सिद्धरामय्या यांच्याविरोधातील भाजपाच्या उमेदवाराचे काय झाले? दोन जागांवर लढवली होती निवडणूक

महाविकास आघाडीने किंवा अजित पवार यांनी लोकसभा आणि विधानसभा निवडणुका एकत्र होतील, असा अंदाज व्यक्त केला असतानाच लोकसभेबरोबरच विधानसभेची निवडणूक होण्याची शक्यता आज तरी दिसत नाही, असे भाजपचे प्रदेशाध्यक्ष बावनकुळे यांनी मत व्यक्त केले आहे. लोकसभा निवडणुकीनंतरही विधानसभेची मुदत ही सहा महिने आहे. यामुळेच यावर आजच अंदाज व्यक्त करणे घाईचे ठरेल, असेही त्यांनी स्पष्ट केले.

हेही वाचा – सोलापूर लोकसभेच्या जागेवर राष्ट्रवादीची डोळा? सुशीलकुमार शिंदे यांची भूमिका महत्त्वाची

भाजपमध्ये एकत्रित निवडणुकांबाबत दोन मते आहेत. मोदी लाटेचा फायदा घेण्यासाठी लोकसभेबरोबरच विधानसभेची निवडणूक घ्यावी, असा एक मतप्रवाह आहे. तर लोकसभेबरोबर विधानसभेची निवडणूक घेतल्यास त्याचा कदाचित लोकसभेला फटका बसू शकतो, अशीही भीती व्यक्त केली जाते. राज्यातील नेत्यांनी कोणतीही भूमिका मांडली तरी शेवटी मोदी-शहा यांच्या पातळीवरच राज्याबाबत निर्णय होईल.