पुणे : कोरेगाव पार्क येथील जमीन गैरव्यवहार प्रकरणात बावधन पोलीस ठाण्यात गुन्हा दाखल झाल्यानंतर पार्थ पवार यांच्या अमेडिया होल्डिंग्ज कंपनीशी संबंधित आणखी एका जमीन व्यवहारप्रकरणी गुन्हा दाखल झाला आहे.
कृषी खात्याकडे बोपोडी येथील पाच हेक्टर जमिनीचा ताबा असताना तहसीलदारांना हाताशी धरून जमिनीचा अपहार करून बेकायदा आदेश आणि पत्र तयार करून शासनाची फसवणूक केल्याच्या तक्रारीप्रकरणी तहसीलदार सूर्यकांत येवले यांच्यासह खडक पोलीस ठाण्यात नऊ जणांविरुद्ध गुन्हा दाखल करण्यात आला आहे. याबाबत नायब तहसीलदार प्रविणा शशिकांत बोर्डे (वय ५०) यांनी खडक पोलीस ठाण्यात फिर्याद दिली आहे. छत्रपती शिवाजी महाराज रस्त्यावरील मामलेदार कचेरीत १२ फेब्रुवारी २०२४ ते १ जुलै २०२५ दरम्यान हा प्रकार घडल्याचे फिर्यादीत म्हटले आहे.
पोलिसांनी दिलेल्या माहितीनुसार, फिर्यादी प्रविणा बोर्डे या नायब तहसीलदार म्हणून उपविभागीय अधिकारी कार्यालय येथे नेमणुकीस आहेत. त्यांनी सरकारकडून प्राधिकृत अधिकारी म्हणून तक्रार दिली आहे. सूर्यकांत येवले तहसीलदार म्हणून शहर मामलेदार कचेरी येथे नियुक्तीस हाेते. १२ फेब्रुवारी २०२४ ते १ जुलै २०२५ या कालावधीत त्यांनी अधिकारपदाचा गैरवापर केला.
शहरामध्ये मुंबई कुळ वहिवाट आणि शेतजमीन अधिनियम १९४८ महापालिका क्षेत्रात लागू नाही. मात्र, बोपोडी येथील एकूण पाच हेक्टर ३५ आर ही जमीन १८८३ पासून कृषी विभागाकडे म्हणजेच शासनाच्या ताब्यात, तसेच वहिवाटीत आहे. या जमिनीचे मालक आणि ताबेदार हे कृषी विभाग असल्याबाबत वरिष्ठांनी स्पष्ट आदेश दिले होते.
या जमिनीचा अपहार करून या जमिनीवर व्हिजन प्रॉपर्टीतर्फे अर्जदार हेमंत गवंडे, त्यांचे वतीने राजेंद्र विद्वांस, ऋषिकेश विद्वांस, मंगल विद्वांस तसेच विद्यानंद पुराणिक, जयश्री संजय एकबोटे, शीतल तेजवानी, दिग्विजय अमरसिंह पाटील यांच्याशी संगनमत करून सरकारी मिळकतीवर त्यांचा मालकी हक्क दिसून येत आहे, असा बेकायदा आदेश आणि पत्र तयार करून शासनाची फसवणूक करण्यात आली आहे, असे फिर्यादीत नमूद करण्यात आले आहे.
याप्रकरणी तहसीलदार सूर्यकांत येवले, व्हिजन प्रॉपर्टीतर्फे कुलमुखत्यारधारक राजेंद्र रामचंद्र विद्धांस (रा. इंद्रा मेमरीज, सकाळनगर, बाणेर रस्ता), ऋषीकेश माधव विद्धांस, मंगल माधव विद्धांस, विद्यानंद अविनाश पुराणिक (रा. नवीन फ्लासिया, इंदूर, मध्य प्रदेश), जयश्री संजय एकबोटे (रा़. चित्रलेखा बिल्डिंग, कुलाबा, मुंबई), कुलमुखत्यारधारक शीतल किसनचंद तेजवानी, तसेच अमेडिया एंटरप्रायझेस एलएलपीचे संचालक दिग्विजय अमरसिंह पाटील यांच्याविरुद्ध गुन्हा दाखल करण्यात आला आहे.
