पुणे : कर्वेनगर, शिवणे भागातील एका नामवंत शाळेतील विद्यार्थ्यांना खाद्यपदार्थ, तसेच वाहतूक सेवा पुरविणाऱ्या एका खासगी कंपनीतील संचालक महिलेला धमकावून नीलेश घायवळ, त्याचा भाऊ सचिन आणि साथीदारांनी ४४ लाखांची खंडणी उकळल्याचा प्रकार उघडकीस आला आहे. या प्रकरणी घायवळसह १३ जणांविरुद्ध गुन्हा दाखल करण्यात आला आहे. या प्रकरणात एका शाळेतील क्रीडा शिक्षकाविरुद्ध गुन्हा दाखल करण्यात आला असून, कोथरूड गोळीबार प्रकरणात पसार असलेल्या नीलेश घायवळविरुद्ध आतापर्यंत सात गुन्हे दाखल करण्यात आले आहेत.
याबाबत एका खासगी कंपनीतील संचालक महिलेने वारजे माळवाडी पोलीस ठाण्यात फिर्याद दिली आहे. तिने दिलेल्या फिर्यादीनुसार, बापू कदम, नीलेश घायवळ, सचिन घायवळ, पप्पू दळवी, अभि गोरडे, दीपक आमले, बाबू वीर, अमोल बंडगर, बाबू पिसाळ, अमोल लाखे, संदीप फाटक, बबलू गोळेकर, बबलू सुरवसे यांच्याविरुद्ध गुन्हा दाखल करण्यात आला आहे, अशी माहिती परिमंडळ तीनचे पोलीस उपायुक्त संभाजी कदम यांनी दिली.
पोलिसांनी दिलेल्या माहितीनुसार, तक्रारदार ४० वर्षीय महिला कोथरूड भागात राहायला आहेत. त्यांनी भागीदारीत एक कंपनी सुरू केली आहे. त्यांच्या कंपनीचे कार्यालय प्रभात रस्ता परिसरात आहे. या कंपनीकडून कर्वेनगर, शिवणे भागातील नामवंत शाळेतील विद्यार्थ्यांना अन्नपदार्थ, तसेच वाहतूक सुविधा पुरविली जाते. शाळांना नियमित भेट देण्यात येत असल्याने महिलेची शाळेतील कर्मचाऱ्यांशी ओळख झाली होती. कर्वेनगर भागातील एका शाळेत क्रीडा शिक्षक म्हणून काम करणारा आरोपी बापू कदम याच्याशी महिलेची ओळख झाली होती.२०२४ मध्ये कदमने महिलेची भेट घेतली. ‘माझी कोथरूड भागात डेअरी आहे. शाळेतील उपाहारृहात दूध आणि पनीर पुरवठा करण्याचे काम मला द्या. माझ्याकडून पनीर, दूध खरेदी करा’, असे त्याने सांगितले. दरम्यान, कदम याचा गुन्हेगारी टोळीशी संबंध असल्याची माहिती महिलेला मिळाली होती. त्यानंतर कदमच्या खात्यात महिलेने २२ लाख दोन हजार रुपये वेळोवेळी पाठविले. मात्र, त्याने पनीर, दूध पुरवठा केला नाही. महिलेने बाहेरून पनीर, दूध खरेदी करुन शाळेतील उपाहारृहाला पुरविले.
पैसे घेऊनही माल न पुरविल्याने महिलेने त्याच्याकडे विचारणा केली. जानेवारी २०२५ मध्ये महिलेने कदमची भेट घेतली.‘ तेव्हा मी नीलेश घायवळ टोळीसाठी काम करत असून, घायवळचा भाऊ सचिन हा क्रीडा शिक्षक आहे. शाळेतील उपाहारृहासाठी आमच्याकडून दूध, पनीर खरेदी करावे लागेल. अन्यथा तुमचा व्यवसाय बंद पाडू’ अशी धमकी कदमने महिलेला दिली. त्यानंतर महिला मोटारीतून शाळेच्या परिसरातून निघाली होती. त्यावेळी कदमने मोटार अडविली. त्यावेळी दुसऱ्या मोटारीतून नीलेश घायवळ, त्याचा भाऊ सचिन आणि साथीदार उतरले. घायवळचा भाऊ सचिन याने धमकावले. ‘तुम्हाला जिवंत राहायचे नाही का?’, अशी धमकी देऊन लवकर खात्यात पैसे जमा करा, असे सांगितले. त्यानंतर महिलेने घाबरून पुन्हा २२ लाख रुपये बँक खात्यात जमा केले. व्यवसाय बंद होऊ नये म्हणून मी आरोपींना पैसे दिले. याबाबत महिलेने कंपनीतील भागीदारांशी चर्चा केली. चौकशीत कदम याची कोथरूडमध्ये डेअरी नसल्याची माहिती समजली. त्यानंतर महिलेने नुकतीच पोलिसांकडे तक्रार दिली, असे फिर्यादीत म्हटले आहे. पोलीस उपायुक्त संभाजी कदम यांच्या मार्गदर्शनाखाली वारजे पोलीस या प्रकरणाचा तपास करत आहेत.
