राज्यातील तत्कालीन महाविकास आघाडी सरकारमुळे पुणेकरांवर कराचे ओझे लादले गेले असून, या संदर्भात लवकरच उपमुख्यमंत्री देवेंद्र फडणवीस यांची भेट घेऊन पुणेकरांना दिलासा देऊ अशी ग्वाही भाजपचे शहराध्यक्ष जगदीश मुळीक यांनी दिली. मुळीक म्हणाले, ‘‘महापालिकेकडून ४० टक्के सवलतीचा ठराव रद्द करणे तसेच पूर्वलक्षी दराने कर वसूल करू नये यासाठी महापालिकेकडून अनेकदा ठराव पाठविण्यात आले होते. महाविकास आघाडी सरकारने या ठरावा कडे दुर्लक्ष केले. ४० टक्के सवलत रद्द करणे आणि त्याची फरकाची रक्कम वसूल करणे हे अन्यायकारक आहे.’’ हेही वाचा : पुणे : ससून रूग्णालयात रूग्णांसह कर्मचाऱ्यांची फसवणूक ; ’सीएमओ’मधून बोलत असल्याची बतावणी महाविकास आघाडी सरकारने ही सवलत रद्द केली आहे. महापालिकेने सवलत रद्द झालेली रक्कम तातडीने वसूल करण्याच्या घेतलेल्या निर्णयाला स्थगिती देऊन पुणेकरांना दिलासा देण्यासाठी लवकरच उपमुख्यमंत्री देवेंद्र फडणवीस आणि मंत्री चंद्रकांतदादा पाटील यांची पुणे शहर भाजपच्या वतीने भेट घेण्यात येणार आहे, असे मुळीक यांनी सांगितले.
