पुण्यात काय चाललंय?… मध्यरात्रीची वाढदिवस सेलिब्रेशन ठरताहेत डोकेदुखी; पुन्हा नवी घटना

याप्रकरणी एकाविरुद्ध गुन्हा दाखल करण्यात आला आहे. याबाबत एका महिलेने स्वारगेट पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला शंकरशेठ रस्त्यावरील शालोम सोसायटीत राहायला आहे. आरोपी याच सोसायटीत राहायला आहे. १३ ऑक्टोबर रोजी आरोपी आणि त्याचा मित्र सोसायटीच्या प्रवेशद्वारासमोर दारू पित होते. वाढदिवस साजरा करताना त्यांनी केक कापला. आरडाओरडा ऐकून महिलेने आरोपी आणि त्याच्यााबरोबर असलेल्या मित्राला जाब विचारला. या कारणावरुन त्यांनी महिलेला शिवीगाळ करुन धक्काबुक्की केली. पोलीस उपनिरीक्षक शिरसाट तपास करत आहेत.

कोथरूडमधील मयूर काॅलनीत एका सोसायटीच्या प्रवेशद्वारासमोर वाढदिवस साजरा करणाऱ्या टोळक्याने सोसायटीतील रहिवाशांना शिवीगाळ केल्याची घटना नुकतीच घडली. सोसायटीतील ज्येष्ठ नागरिकाला शिवीगाळ करुन टोळक्याने धक्काबुक्की केली होती. याप्रकरणी कोथरूड पोलिसांनी सहा जणांना अटक केली होती, तसेच एका अल्पवयीन मुलाला ताब्यात घेतले होते.

शहरात गेल्या काही वर्षांपासून रात्री अपरात्री वाढदिवस साजरा करण्याच्या घटना घडतात. रस्त्यात केक कापणे, आरडाओरडा करणे, तसेच फटाके वाजविले जातात. अशा प्रकारच्या घटनांमुळे रहिवाशांना त्रासाला सामोरे जावे लागते. सराइतांकडून भर चौकात शस्त्राने केक कापण्याच्या घटना घडतात. भर चौकात रात्री वाढदिवस साजरा करणाऱ्या टोळक्याविरुद्ध कारवाईची मागणी नागरिकांनी केली आहे.