यंदाच्या मोसमात शहर, जिल्ह्यातील पाऊसमान किती? येत्या काही दिवसांत कसा असेल पाऊस?

दरवर्षीच्या ढोबळमानानुसार मोसमी वारे केरळमध्ये १ जूनच्या सुमारास दाखल होतात, ८ जुलैपर्यंत देश व्यापतात, १७ सप्टेंबरच्या सुमारास माघारी फिरण्यास सुरुवात होऊन १५ ऑक्टोबरच्या सुमारास निघून जातात. मात्र, यंदा २४ मे रोजी केरळमध्ये दाखल झालेल्या मोसमी वाऱ्यांनी अवघ्या दोनच दिवसांत पुणे गाठले. २६ मे रोजीच मोसमी वारे पुण्यात दाखल झाले. त्यामुळे मेच्या शेवटच्या आठवड्यापासून शहरात पाऊस सुरू झाला.

हवामान विभागाच्या आकडेवारीनुसार जून ते सप्टेंबर या अधिकृत पावसाळ्यात शहरात यंदा ८४९.२ मिलिमीटर पावसाची नोंद झाली. शहरात सरासरी ६३८.२ मिलिमीटर पाऊस पडतो. मात्र, यंदा ३३ टक्के जास्त पाऊस नोंदवला गेला आहे.

जिल्ह्यातही यंदा सरासरीपेक्षा जास्त पाऊस नोंदवला गेल्याचे हवामान विभागाच्या संकेतस्थळावरील आकडेवारीवरून दिसून येत आहे. जिल्ह्यात जून ते सप्टेंबर या कालावधीत सरासरी ९४९.२ मिलिमीटर पाऊस पडतो. मात्र, यंदा सरासरीपेक्षा १६ टक्के जास्त, म्हणजे १ हजार ९७.४ मिलीमीटर पाऊस पडला आहे.

जून, सप्टेंबरमध्ये जास्त पाऊस

शहरातील पावसाच्या महिनानिहाय आकडेवारीचा आढावा घेतला असता जास्त पावसाचे महिने मानल्या जाणाऱ्या जुलै आणि ऑगस्टमध्ये सरासरीपेक्षा कमी पाऊस पडला. मात्र, जून आणि सप्टेंबरमधील पावसाने सरासरी भरून काढली.

आकडेवारीनुसार जूनमध्ये २६७.५ मिलिमीटर (सरासरीपेक्षा ६१ टक्के अधिक), जुलैमध्ये १३०.३ मिलिमीटर (सरासरीपेक्षा २८ टक्के कमी), ऑगस्टमध्ये १३४.७ मिलिमीटर (सरासरीपेक्षा ७ टक्के कमी), तर सप्टेंबरमध्ये ३१६.७ मिलिमीटर (सरासरीपेक्षा ११६ टक्के अधिक) पाऊस नोंदवला गेला आहे.