पिंपरी-चिंचवड शहरातील डॉ. अटलांटा बेग या कंपनीत भीषण आग लागल्याने मोठे नुकसान झाले आहे. आग मोठी असल्याने काही किलोमीटरवरून धुरांचे लोट दिसत होते. पिंपरी-चिंचवड महानगर पालिकेच्या पाच अग्निशमन दलाच्या वाहनांनी घटननास्थळी जाऊन दीड तासात आग आटोक्यात आणली. सुदैवाने या घटनेत कोणतीही जीवितहानी झालेली नाही. अग्निशमन विभागाने दिलेल्या माहितीनुसार, आज दुपारी पाच वाजेच्या सुमारास पिंपरीतील मोरवाडी येथे असणाऱ्या डॉ. अटलांटा बेग या कंपनीत शॉर्टसर्किटमुळे भीषण आग लागली होती. आज शनिवार असल्याने काही कामगारांना सुट्टी होती. तर, काही कामगार कंपनीत होते. मात्र, आगीच्या घटनेत सुदैवाने जीवितहानी किंवा कामगार जखमी झालेले नाहीत. कंपनीतील रासायनिक माल जळून खाक झाला असून तब्बल ५५ लाखांचे नुकसान झाल्याची माहिती कंपनीने अग्निशमन विभागाला दिली आहे.
