पुणे : महापालिकेच्या वतीने सुरू असलेल्या नदीकाठ सुधार प्रकल्पातील वृक्षतोडीबाबत दाखल करण्यात आलेली जनहित याचिका मुंबई उच्च न्यायालयाने फेटाळली. यामुळे या प्रकल्पातील अडचण दूर झाली आहे.
ही याचिका फेटाळताना याचिकाकर्त्यांना पुढील वृक्षतोड व पर्यावरण विषयक नियमांचा भंग होत असल्याचे निदर्शनास आल्यास संबंधित प्रस्तावांवर आक्षेप नोंदविण्याची मुभा न्यायालयाने त्यांना दिली आहे. दरम्यान महापालिकेने २७ एप्रिलपर्यंत ५ हजार तर २७ एप्रिल ते ११ जुलै या कालावधीत २ हजार ३६९ अशी एकूण ७ हजार ४६९ झाडे लावली आहेत.
पुणे महापालिकेच्या वतीने शहरातून वाहणाऱ्या मुळा मुठा नदीचा ४४ किलोमीटरचा काठ सुशोभित करण्याचा प्रकल्प हाती घेण्यात आला आहे. या कामासाठी ४ हजार ७०० कोटी रुपयांचा प्रकल्प मंजूर करून घेतला आहे. पंतप्रधान नरेंद्र मोदी यांच्या हस्ते मार्च २०२१ मध्ये या प्रकल्पाचे भूमिपूजन झाले होते. पहिल्या टप्प्यात संगमवाडी ते बंडगार्डन पूल आणि बंडगार्डन पूल ते मुंढवा पूल अशा टोन टप्प्यात काम सुरू आहे.
या प्रकल्पासाठी नवीन वृक्ष लावण्यात आले नसल्याबद्दल शाल्वी पवार व तन्मयी शिंदे यांनी उच्च न्यायालयात धाव घेत जनहित याचिका दाखल केली होती. ही याचिका फेटाळत न्यायालयाने ११ जुलै रोजी आदेश दिला. नदीकाठ सुधार विकास प्रकल्पाचा पहिला टप्पा पूर्ण झाला आहे असे महापालिकेने न्यायालयामध्ये सादर केलेल्या प्रतिज्ञापत्रात नमुद केले आहे. त्यामध्ये किती वृक्ष काढण्यात आले, किती वृक्षांचे पुनर्रोपण करण्यात आले, कुठल्या प्रकारचे नवीन वृक्ष लावण्यात आले. त्यांची संख्या किती आहे, त्याच्या देखभाल दुरुस्तीबाबत काय केले जात आहे. याविषयीचा उल्लेख प्रतिज्ञापत्रामध्ये नमूद करण्यात आला होता.
त्यावर महापालिकेने लावलेल्या झाडांची व्यवस्थित देखभाल दुरुस्ती व्हावी, याकडे गांभीर्याने लक्ष देण्याबाबत न्यायालयाने महापालिकेस सांगितले आहे, असे महापालिकेच्या विशेष प्रकल्प विभागाचे कार्यकारी अभियंता बिपिन शिंदे यांनी सांगितले.
काय आहे नक्की प्रकल्प
शहरातून वाहणाऱ्या नद्यांची स्थिती फारशी चांगली नाही. या नद्यांना सध्या नाल्याचे स्वरूप आले आहे. वाढते शहरीकरण, प्रक्रीया न झालेले सांडपाणी नद्यांमध्ये सर्रासपणे सोडले जाणे, नदीपात्रात कचरा टाकणे यामुळे नद्यांमध्ये प्रदूषण वाढलेले आहे. पुणे पालिकेच्या हद्दीत साधारणपणे ४४ किलोमीटर नदी आहे. त्यापैकी २२.२ किलोमीटर मुळा तर १०.४ किलोमीटर मुठा नदी आणि ११.८ किलोमीटर मुळा-मुठा नदी आहे. या नद्यांचे अस्तित्व टिकवण्यासाठी महापालिकेने नदी सुधार प्रकल्प हाती घेतला आहे.
