पुणे : सिंहगड रस्ता भागातील धायरीतून दुचाकी चोरणाऱ्या चोरट्यांना पोलिसांनी अटक केली. चोरट्यांकडून दोन दुचाकी जप्त करण्यात आल्या.
ओंकार संतोष सातपुते (वय २०, रा. लायगुडे वस्ती, धायरी), साईराज अतुल तावरे (वय १८, रा. कांबळे वस्ती, धायरी) अशी अटक करण्यात आलेल्यांची नावे आहेत. धायरी परिसरातून दोन दुचाकी चोरीला गेल्या होत्या. याप्रकरणी नांदेड सिटी पोलीस ठाण्यात गुन्हा दाखल करण्यात आला होता. दुचाकी चोरट्यांच्या मागावर पोलिसांचे पथक होते. सराइत चोरटे सातपुते आणि तावरे यांनी दुचाकी चोरीचे गुन्हे केल्याची माहिती तपास पथकातील पोलीस कर्मचारी मोहन मिसाळ आणि शिवा क्षीरसागर यांना मिळाली. त्यानंतर पोलिसांनी सापळा लावून दोघांना पकडले. चौकशीत दोघांनी दुचाकी चोरीची कबुली दिली.
पोलीस उपायुक्त संभाजी कदम, सहायक आयुक्त अजय परमार यांच्या मार्गदर्शनाखाली नांदेड सिटी पोलीस ठाण्याचे वरिष्ठ पोलीस निरीक्षक अतुल भोस, गुन्हे शाखेचे पोलीस निरीक्षक गुरुदत्त मोरे, सहायक निरीक्षक राहुल यादव, मिसाळ, क्षीरसागर, राजू वेगरे, उत्तम शिंदे, स्वप्नील मगर, नीलेश कुलथे, संग्राम शिनगारे यांनी ही कारवाई केली.
