पुणे : मुंबई-बंगळुरू बाह्यवळण मार्गावर नवले पुलाजवळ प्रवासी वाहतूक करणाऱ्या बसला आग लागली. आगीत बस पूर्णपणे जळाली. बसमधील सर्व प्रवासी वेळीच बाहेर पडल्याने मोठी दुर्घटना टळली. सुदैवाने या घटनेत कोणी जखमी झाले नाही.
बाह्यवळण मार्गावरुन मध्यरात्री दोनच्या सुमारास प्रवासी बस निघाली होती. नऱ्हे परिसरातील श्री स्वामी नारायण मंदिराजवळ धावत्या बसमधून धूर येण्यास सुुरुवात झाली. बसचालकाच्या निदर्शनास हा प्रकार आला. बसमधील वाहकाने त्वरीत गाढ झोपेत असलेल्या प्रवाशांना जागे केले. आग लागल्याची माहिती मिळताच बसमधील प्रवासी घाबरले. बसमधील प्रवासी त्वरित बसमधून बाहेर पडले. बसमधील चालक आणि वाहकाने प्रवाशांनी उतरण्यासाठी मदत केली. बसमधून प्रवासी उतरल्यानंतर बसने पेट घेतला.
या घटनेची माहिती मिळताच अग्निशमन दलाच्या जवानांनी घटनास्थळी धाव घेतली. सिंहगड रस्ता अग्निशमन केंद्राचे प्रमुख प्रभाकर उमराटकर यांच्या मार्गदर्शनाखाली जवानांनी पाण्याचा मारा करुन आग आटोक्यात आणली. आगीत बस पूर्णपणे जळाली, तसेच घटनास्थळी मोठा धूर झाला होता. बसमधील प्रवासी त्वरित बाहेर पडल्याने मोठी दुर्घटना टळली. सुदैवाने या घटनेत कोणी जखमी झाले नाही, अशी माहिती अग्निशमन दलाचे केंद्रप्रमुख प्रभाकर उमराटकर यांनी दिली. आगीमागचे निश्चित कारण समजू शकले नाही. बसमधील तांत्रिक बिघाड किंवा शाॅर्टसर्किटमुळे आग लागल्याची शक्यता व्यक्त करण्यात आली आहे.
मुंबई-पुणे बाह्यवळण मार्गावर गंभीर स्वरुपाच्या अपघाताच्या घटना घडल्या आहेत. या परिसरात यापूर्वी प्रवासी वाहतूक करणाऱ्या बसला आग लागल्याच्या घटना घडल्या आहेत. बाह्यवळण मार्गावरील दरीपूल ते स्वामी नारायण मंदिर परिसरात तीव्र उतार आहे. उतारावर ट्रक, कंटेनर, तसेच बसचालकांचे नियंत्रण सुटून गंभीर स्वरुपांच्या अपघात घडले आहेत. भरधाव वाहनाच्या धडकेमुळे नऱ्हे परिसरातील नवले पूल परिसरात गंभीर अपघात घडले आहेत. बाह्यवळण मार्गावरील गंभीर स्वरुपाच्या अपघातांच्या घटना रोखण्यासाठी या भागात महामार्गा प्राधिकरण आणि वाहतूक पोलिसांनी उपाययोजना केल्या आहेत. उपाययोजना केल्यामुळे गंभीर स्वरुपाच्या अपघाताच्या घटना काही प्रमाणात कमी झाल्या आहेत. बाह्यवळण मार्गावरील वेगमर्यादेबाबत जागोजागी फलक लावण्यात आले आहे. हे फलक विविध भाषांमध्ये लावण्यात आल्याने परराज्यातील वाहनचालकांना अपघात क्षेत्राची माहिती मिळण्यास मदत झाली आहे. या भागात पोलिसांनी चौकी सुरू केली आहे. वाहनांचा वेग कमी करण्यासाठी गतीरोधक पट्टिका (रम्बलिंग स्ट्रीप) बसविण्यात आल्या आहेत, तसेच बाह्यवळण मार्गालगत कठडे बसविण्यात आले आहेत.
