पुणे : गणेश मंडळांचे देखावे पाहण्यासाठी होणारी गर्दी विचारात घेऊन आज, रविवारपासून (३१ ऑगस्ट) शहराच्या मध्य भागातील प्रमुख रस्ते सायंकाळी पाचनंतर वाहतुकीस बंद करण्यात येणार आहेत. लक्ष्मी रस्ता, छत्रपती शिवाजी महाराज रस्ता, बाजीराव रस्ता, टिळक रस्ता वाहतुकीस बंद केले जाणार आहेत. वाहनचालकांनी पर्यायी मार्गांचा वापर करावा, असे आवाहन वाहतूक पोलिसांनी केले आहे. विसर्जन सोहळ्यापर्यंत (५ सप्टेंबर) शहरातील वाहतूक व्यवस्थेत बदल करण्यात आले आहेत.
घरगुती गणपती आणि गौरी विसर्जनानंतर सार्वजनिक गणेश मंडळांच्या गणपतींच्या दर्शनासाठी आणि देखावे पाहण्यास गर्दी होते. शहराच्या मध्य भागात गर्दी होण्याची शक्यता असल्याने वाहतूक व्यवस्थेत बदल करण्यात आले आहेत. अत्यावश्यक सेवेतील वाहने वगळता अन्य सर्व वाहनांसाठी सायंकाळी पाचनंतर मध्य भागातील प्रमुख रस्ते बंद ठेवण्यात येणार आहेत. गर्दी ओसरेपर्यंत मुख्य रस्ते बंद असतील. नागरिकांनी पर्यायी मार्गांचा वापर करावा, असे आवाहन वाहतूक शाखेचे पोलीस उपायुक्त हिंमत जाधव यांनी केले आहे.
वाहतुकीस बंद असणारे रस्ते पुढीलप्रमाणे
लक्ष्मी रस्ता (हमजेखान चौक ते टिळक चौक), छत्रपती शिवाजी महाराज रस्ता (गाडगीळ पुतळा चौक ते देशभक्त केशवराव जेधे चौक, स्वारगेट), बाजीराव रस्ता (पूरम चौक ते अप्पा बळवंत चौक), टिळक रस्ता (मराठा चेंबर ऑफ कॉमर्स ते हिराबाग चौक)
वाहतुकीस बंद असणारे अंतर्गत रस्ते पुढीलप्रमाणे
सिंहगड गॅरेज (घोरपडे पेठ ते राष्ट्रभूषण चौक ते हिराबाग चौक), दिनकरराव जवळकर चौक ते पायगुडे चौक ते हिराबाग चौक, कै. अनंत बाळकृष्ण नाईक पथ ते टिळक रस्ता, सणस रस्ता (गोटीराम भैय्या चौक, मंडई ते गोविंद हलवाई चौक), पानघंटी चौक ते गंज पेठ पोलीस चौकी, गंज पेठ ते वीर लहुजी वस्ताद तालीम चौक, गायकसाब मशीद ते सेंटर स्ट्रीट पोलीस चौकी (लष्कर), कोहिनूर चौक ते बाबाजान चौक (लष्कर), जेधे प्रासाद रस्ता, सुभानशाह दर्गा, पार्श्वनाथ चौक, शास्त्री चौक ते सोन्या मारुती चौक, गुरुनानक पथ ते हमजेखान चौक (देवजीबाबा चौक, गणेश पेठ), कोहिनूर चौक ते बाबाजान चौक (लष्कर), गावकसाब मशिद ते सेंट्रल स्ट्रीट पोलीस चौकी, (लष्कर).
वाहने लावण्यास मनाई
छत्रपती शिवाजी महाराज रस्त्यावरील जिजामाता चौक ते मंडई, मंडई ते शनिपार, शनिपार ते फुटका बुरूज, अप्पा बळवंत चौक ते बुधवार चौक या भागात वाहने लावण्यास मनाई करण्यात आली आहे.
एकेरी वाहतूक शिथिल
गणेशोत्सवात रविवारपासून ५ सप्टेंबरपर्यंत रात्री गर्दी ओसरेपर्यंत कुमठेकर रस्ता, फडके हौद रस्ता, सिंहगड गॅरेज ते महापालिका कार्यशाळा (घोरपडे पेठ), लष्कर भागातील कोहिनूर हॉटेल चौक ते भगवान महावीर चौक (महात्मा गांधी रस्ता) या मार्गावरील एकेरी वाहतुकीचे आदेश गरजेनुसार तात्पुरत्या स्वरूपात शिथिल करण्यात येणार आहेत, असे पोलीस उपायुक्त हिंमत जाधव यांनी कळविले आहे.
