पुण्यात कोथरूड, सिंहगड रस्ता, हडपसर भागांत अपघात; तीन तरुणांचा मृत्यू

कोथरूड भागात भुसारी काॅलनीकडे जाणाऱ्या सेवा रस्त्यावर शुक्रवारी दुपारी एकच्या सुमारास दोन दुचाकींची समोरासमोर धडक झाली. अपघातात दुचाकीस्वार तरुणाचा मृत्यू झाल्याची घटना घडली. अपघातात दुचाकीवरील सहप्रवासी तरुण गंभीर जखमी झाला. ऋतिक एडने (वय २२, रा. पिंपळे निलख) असे मृत्युमुखी पडलेल्या दुचाकीस्वाराचे नाव आहे. सहप्रवासी आकाश अजित भेके (वय २३, रा. जुन्नर) गंभीर जखमी झाला आहे.

पोलिसांनी दिलेल्या माहितीनुसार, दुचाकीस्वार ऋतिक आणि त्याचा मित्र आकाश बाह्यवळण मार्गावरून कोथरूडमधील भुसारी काॅलनीकडे निघाले होते. सेवा रस्त्यावर दुपारी एकच्या सुमारास समोरून भरधाव आलेल्या दुचाकीने ऋतिक आणि आकाश यांना धडक दिली. त्यात ऋतिक याच्या डोक्याला गंभीर दुखापत झाली. सहप्रवासी आकाश गंभीर जखमी झाला. दोघांना खासगी रुग्णालयात दाखल करण्यात आले. उपचारांपूर्वीच ऋतिकचा मृत्यू झाला. पोलीस उपनिरीक्षक कुंभार तपास करत आहेत.

भरधाव मोटारीची दुचाकीला धडक

हडपसर-मुंढवा रस्त्यावर मांजरी परिसरात भरधाव मोटारीने दुचाकीला धडक दिली. अपघातात दुचाकीस्वार तरुणाचा मृत्यू झाला. त्याचा सहप्रवासी जखमी झाल्याची घटना शुक्रवारी रात्री घडली. कुणाल संतोष घाडगे (वय २१, रा. गोपाळपट्टी, मांजरी बुद्रुक, हडपसर) असे मृत्युमुखी पडलेल्या दुचाकीस्वाराचे नाव आहे. अपघातात महेश बबन घाडगे गंभीर जखमी झाला. याप्रकरणी मोटारचालकाविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, दुचाकीस्वार कुणाल आणि त्याचा चुलत भाऊ महेश शुक्रवारी रात्री एकच्या सुमारास मुंढवा रस्त्याने निघाले होते. त्या वेळी हाॅटेलसमोरून भरधाव आलेल्या मोटारीने त्यांना धडक दिली. अपघातानंतर घटनास्थळी न थांबता पसार झालेल्या मोटारचालकाचा शोध घेण्यात येत असून, पोलीस उपनिरीक्षक बालाजी डिगोळे तपास करत आहेत.

बसच्या धडकेत तरुणाचा मृत्यू

वडगाव बुद्रुक परिसरात सिंहगड महाविद्यालय रस्त्यावर विद्यार्थी वाहतूक करणाऱ्या बसच्या धडकेत महाविद्यालयीन दुचाकीस्वार तरुणाचा मृत्यू झाल्याची घटना शुक्रवारी सकाळी घडली. स्वप्नील संपतराव पवार (वय २३, रा. शिवाजीनगर, कडेगाव, जि. सांगली) असे मृत्युमुखी पडलेल्याचे नाव आहे. याप्रकरणी बसचालक धनाजी शंकर चव्हाण (वय ४१, रा. ओंकार हाइट्स, नऱ्हे) याला अटक करण्यात आली. या अपघातात सहप्रवासी तरुणी ऋतुजा कदम हिला दुखापत झाली आहे.

पोलिसांनी दिलेल्या माहितीनुसार, दुचाकीस्वार स्वप्नील आणि ऋतुजा शुक्रवारी सकाळी पावणेअकराच्या सुमारास वडगाव बुद्रुकमधील सिंहगड महाविद्यालय रस्त्याने निघाले होते. त्या वेळी विद्यार्थी वाहतूक करणाऱ्या बसने दुचाकीस्वार स्वप्नील आणि ऋतुजा यांना धडक दिली. अपघातात स्वप्नील गंभीर जखमी झाला. त्याला तातडीने खासगी रुग्णालयात दाखल करण्यात आले. उपचारांपूर्वीच स्वप्नीलचा मृत्यू झाला. पोलीस उपनिरीक्षक भूपेश साळुंके तपास करत आहेत.