द्रुतगती मार्गावरील अपघात रोखण्यासाठी २४ तास वाहन तपासणी; परिवहन आयुक्तांचे आदेश

डिसेंबर महिन्यात मुंबई-पुणे द्रुतगती मार्ग आणि मुंबई-पुणे महामार्गावर पुणे आणि पनवेल विभागाकडून विशेष मोहीम राबविण्यात यावी. या मोहिमेत पोलीस, परिवहन विभाग तसेच आयआरबीचे पथक २४ तास गस्त घालणार आहेत. या मोहिमेत सहभागी होणाऱ्या पथकांची संख्या तसेच अन्य उपाययोजनांबाबत आराखडा करण्यात येणार आहे. मुंबई-पुणे द्रुतगती मार्गावर २४ तास वाहनांची तपासणी करण्यात येणार आहे, असे आदेश भिमनवार यांनी बैठकीत दिले.

हेही वाचा: ऑनलाइन दस्तांची नोंदणी २४ तासांत करा, अन्यथा कारवाई; नोंदणी व मुद्रांक शुल्क विभागाचे आदेश

द्रुतगती मार्गावर अपघातामागची कारणे
द्रुतगती मार्गावर घाट उतरताना वाहनांचे ब्रेक निकामी होऊन अपघात होतात. मार्गिका सोडून वाहने पुढे जातात. द्रुतगती मार्गावर वाहने बंद पडतात. अशा वेळी पाठीमागून वेगाने येणारे वाहन थांबलेल्या वाहनांवर आदळते. बहुतांश अपघात वेगामुळे होत असून अपघात रोखण्यासाठी वाहनांची तपासणी करण्याचे आदेश परिवहन आयुक्त विवेक भिमनवार यांनी दिले. अपघात रोखण्यासाठी वाहनाचालकांनी स्वयंशिस्त पाळायला हवी. वाहतूक नियमांचे पालन करायला हवे, असे आवाहन भिमनवार यांनी केले आहे.

परिवहन विभागाच्या ८२ सेवा ऑनलाइन
नागरिकांच्या सोयीसाठी परिवहन विभागाकडून देण्यात येणाऱ्या ११६ सेवांपैकी ८२ सेवा ऑनलाइन पद्धतीने देण्यात येत आहेत. ऑनलाइन सेवेमुळे नागरिकांना प्रत्यक्ष परिवहन कार्यालयात येण्याची आवश्यकता नसल्याची माहिती भिमनवार यांनी दिली.

हेही वाचा: पुणे, नागपूरमध्ये मोफत मधुमेह समुपदेशन केंद्र; डॉ. जगन्नाथ दीक्षित यांची माहिती

पुण्यात ५२ हजार इलेक्ट्रिक वाहनांची नोंद
इलेक्ट्रिक वाहनांच्या वापरास शासनाकडून प्रोत्साहन देण्यात येत आहे. प्रादेशिक परिवहन विभागाच्या पुणे विभागात आतापर्यंत ५२ हजार ५२० इलेक्ट्रिक वाहनांची नोंद करण्यात आली आहे. इलेक्ट्रिक वाहनांच्या करात शासनाने सवलत दिली असून महसुलापेक्षा पर्यावरण संवर्धनास महत्त्व देण्यात आले असल्याचे प्रादेशिक परिवहन अधिकारी डाॅ. अजित शिंदे यांनी सांगितले.