पुणे : माहेरहून पैसे आणण्याची मागणी करणाऱ्या पतीच्या छळाला कंटाळून महिलेने गळफास घेऊन आत्महत्या केल्याची घटना लोणी काळभोर भागात घडली. याप्रकरणी पतीविरुद्ध गुन्हा दाखल करण्यात आला आहे. स्नेहल मयूर चौधरी (वय २९, रा. नायगाव, ता. हवेली, जि. पुणे) असे आत्महत्या केलेल्या महिलेचे नाव आहे.
हेही वाचा >>> पुणे: पोलिसांच्या तत्परतेमुळे आत्महत्या टळली; सजग कार्यकर्त्याचे प्रयत्न
याबाबत तिचा भाऊ इंद्रजीत नारायण कांचन (वय २४, रा. उरुळी कांचन) याने लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, स्नेहलचा पती मयूर चौधरी याचा सिमेंटचे पाइप तयार करण्याचा व्यवसाय आहे. व्यवसायात तोटा झाल्याने त्याने स्नेहलला माहेरहून पैसे आणण्याची मागणी केली होती. भावाने घरातील दुभती गाय विकून मयूरला दोन लाख रुपये दिले होते. त्यानंतर मयूरने पैसे आणण्यासाठी स्नेहलकडे तगादा लावला होता. छळाला कंटाळून स्नेहलने गळफास घेऊन आत्महत्या केली. पोलीस उपनिरीक्षक देशमुख तपास करत आहेत.
