पुणे : श्वानाच्या मृत्यू प्रकरणी कल्याणीनगर भागातील एका पेटशाॅपच्या मालकासह तिघांविरुद्ध येरवडा पोलिसांनी गुन्हा दाखल केला.या प्रकरणी पेटशाॅपच्या मालकासह कर्मचाऱ्यांविरुद्ध गुन्हा दाखल करण्यात आला. याबाबत एका तरुणीने येरवडा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार तरुणी वडगाव शेरी भागातील एका उच्चभ्रु सोसायटीत राहायला आहे. तिने ‘डॅश’ नावाचा श्वान पाळला होता.
कल्याणीनगर भागात वेटीक पेट शाॅप आहे. पेट शाॅपमध्ये श्वानांची देखभाल, निगराणी राखली जाते. तरुणीने २८ सप्टेंबर रोजी तिचे श्वान पेटशाॅपमध्ये पाठविले होते. तरुणीच्या श्वानाला आंघोळ घातल्यानंतर त्याला उलटी झाली. त्यानंतर त्याचा मृत्यू झाला, असे तरुणीने दिलेल्या फिर्यादीत म्हटले आहे.
श्वानाल आंघोळ योग्य पद्धतीने घातली नाही. पेटशाॅपमधील कर्मचाऱ्यांच्या बेजबाबदारपणामुळे दुर्घटना घडल्याचे तरुणीने फिर्यादीत नमूद केले आहे. तरुणीने दिलेल्या फिर्यादीनुसार, प्राणी क्रुरता प्रतिबंधक अधिनियम कलम ११, तसेच अन्य कलमांन्वये पेटशाॅपच्या मालकासह कर्मचाऱ्यांविरुद्ध गुन्हा दाखल करण्यात आला आहे. सहायक पोलीस निरीक्षक पाटील तपास करत आहेत.
