पुणे :पत्नीने दुसरा विवाह करून फसवणूक केल्याने एका तरुणाने गळफास घेऊन आत्महत्या केल्याची घटना वडगाव शेरी परिसरात घडली. याप्रकरणी चंदननगर पोलिसांनी पत्नीसह दोघांविरुद्ध गुन्हा दाखल केला.
याबाबत मृत व्यक्तीच्या मोठ्या भावाने चंदननगर पोलीस ठाण्यात फिर्याद दिली आहे. त्यानुसार पत्नी आणि अन्य एकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, संबंधित तरुणाचा २०१४ मध्ये विवाह झाला होता. त्यानंतर पत्नीचे आरोपीशी प्रेमसंंबंध जुळले. कायदेशीर घटस्फोट न घेता ती आरोपीबरोबर राहू लागली.
‘दुसरा विवाह केल्यानंतर मी खूश नाही. मला तुझ्यासोबत राहायचे नाही. मी परत येणार आहे,’ असे तिने पतीला सांगितले. त्यानंतर पत्नीने तिच्या मित्राबरोबर संगनमत करून तरुणाकडून वेळोवेळी १५ लाख १८ हजार रुपये घेतले. नांदायला येते, असे आमिष दाखविले.
त्यानंतर पत्नी नांदायला न आल्याने तरुणाने तिच्याकडे विचारणा केली. त्याने तिच्याकडे पैसे परत मागितले. तेव्हा ‘मी बलात्कार आणि छळ केल्याप्रकरणी गुन्हा दाखल करीन. तू आणखी पैसे पाठव’, अशी धमकी पत्नीने त्याला दिली. पत्नीचा छळ आणि तिच्या धमकीमुळे तरुणाने राहत्या घरात गळफास घेऊन नुकतीच आत्महत्या केली, असे फिर्यादीत म्हटले आहे. पोलीस उपनिरीक्षक पाटील तपास करत आहेत.
