ठाणे जिल्ह्यात ‘प्रोजेक्ट महादेवा’ फुटबॉल निवड चाचणीत ४० खेळाडूंची निवड,राज्य स्तरावर निवड होणाऱ्या खेळाडूंना लिओनेल मेस्सीसोबत खेळण्याची संधी

‘महादेवा’ या योजनेचा मुख्य उद्देश राज्यातील युवा खेळाडूंना फुटबॉलमध्ये करिअर करण्यासाठी प्रोत्साहन देणे हा आहे. या योजनेचा एक भाग म्हणून, राज्यातील १३ वर्षांखालील मुले व मुलीसाठी जिल्हा, विभाग आणि राज्य स्तरावर फुटबॉल निवड चाचण्यांचे आयोजन करण्यात येत आहे. ठाणे जिल्ह्यातील खेळाडूंची निवड चाचणी ०१ नोव्हेंबर रोजी मुले आणि ०२ नोव्हेंबर रोजी मुली या कालावधीत आयोजित करण्यात आली होती. ही चाचणी जिल्हा क्रीडा अधिकारी कार्यालय, ठाणे आणि ठाणे फुटबॉल असोसिएशन (TFA) यांच्या संयुक्त विद्यमाने घेण्यात आली. दोन दिवस चाललेल्या या निवड चाचण्यांमध्ये ठाणे जिल्ह्यातील तरुण फुटबॉलपटूंनी दाखविलेला सहभाग, शिस्त आणि उत्साह पाहता ठाणे जिल्ह्यातील फुटबॉल संस्कृती व तरुण प्रतिभा विकासाबाबतची बांधिलकी अधोरेखित झाली. या निवड प्रक्रियेत पहिल्या दिवशी ३५५ मुले आणि दुसऱ्या दिवशी ६४ मुली अशा एकूण ४१९ खेळाडूंनी सहभाग घेतला. काटेकोर निवड प्रक्रियेनंतर २० मुले आणि २० मुलींची ठाणे जिल्ह्याच्यावतीने पुढील विभागीय फेरीसाठी निवड करण्यात आली.

लिओनेल मेस्सीसोबत खेळण्याची संधी

विभागीय आणि राज्य स्तरावर निवड होणाऱ्या खेळाडूंना १४ डिसेंबर, २०२५ रोजी मुंबई येथे जागतिक कीर्तीचे फुटबॉलपटू लिओनेल मेस्सी यांच्यासोबत खेळण्याची अभूतपूर्व संधी मिळणार आहे.

या खेळाडूंची निवड

१३ वर्षाखालील मुले :- आर्यव्रत आशिष सरस्वत, निहार विकास नांबियार, आर्य राममूर्ती नायडू, दैविक कमलेश गलानी, रणवीर सिंह चावला, आरव चंद्रकांत सोनवणे, मल्हार लक्ष्मीकांत सावंत, अनय अमित भुसकुटे, तनिष चंद्रशेखर मल्लि, आर्यन संतोष पिंगळे, लक्ष्य नरेश मळकर, गिरीश मेनन, एफ्रॉन अॅग्नेलो डिसा, कनिष्क संजय मिश्रा, निहार कृष्ण एस, तनय रंजीत, शीहान बॅनर्जी, विहान नागधर बांदी, स्वरित संजय सातपुते व हर्षित नरेंद्र निकम.

१३ वर्षाखालील मुली :- स्वयमप्रभा महाराणा, जीविका राजपूत, निहारिका सुरेश, हना खान, स्वर विक्रम कुदळे, नव्या पाटील, जीविका रुपेजा, कृतिका राय, दुर्वा तर्मळे, रेबेका सिबी, समायरा सिग, कियाराह अनिरुद्ध सराफ, मन्नत धीरज आहुजा, अक्षरा आदर्श शेट्टी, आश्मी आदर्श शेट्टी, आरझू विकास कदम, लावण्य रविंद्र ठाकरे, अनु मेघा रूपेश, त्रयी प्रभाष शेट्टी व फाटक इराम शमशुद्दीन.

ठाणे जिल्ह्यातील फुटबॉलची पायाभरणी मजबूत

“प्रोजेक्ट महादेवा” हा उपक्रम महाराष्ट्रभरातील तरुण फुटबॉल प्रतिमा शोधण्यासाठी आणि त्यांना योग्य प्रशिक्षण देण्यासाठी एक महत्त्वपूर्ण व्यासपीठ ठरत आहे. ठाणे जिल्ह्यातील या निवड चाचण्यांनी पुन्हा एकदा सिद्ध केले की, ठाणे जिल्ह्यातील फुटबॉलची पायाभरणी मजबूत असून भविष्यात अनेक उत्कृष्ट खेळाडू राज्य आणि राष्ट्रीय स्तरावर ठसा उमटवतील, असे मत ठाणे जिल्हा क्रीडा अधिकारी सुवर्णा बारटक्के यांनी व्यक्त केले.