Thane Metro Trial Run News: ठाणेकरांना सार्वजनिक वाहतुकीचा नवा पर्याय उपलब्ध व्हावा यासाठी मेट्रो मार्गिकेची उभारणी करण्यात आली आहे. यापैकी घोडबंदर मार्गावरील चार मेट्रो स्थानकांची आज, सोमवारी मुख्यमंत्री देवेंद्र फडणवीस यांच्या उपस्थितीत एमएमआरडीए करणार तांत्रिक तपासणी आणि ट्रायल रन करणार आहे.
मुंबई महानगरातील वाहतुक कोंडी, उपनगरीय रेल्वे मार्गावरील ताण कमी करण्यासाठी मेट्रो मार्ग चार (वडाळा-घाटकोपर-कासारवडवली) आणि ४अ (कासारवडवली–गायमुख) प्रकल्प उभारला जात आहे. या मार्गिकेवर सोमवारी मुख्यमंत्री देवेंद्र फडणवीस यांच्या उपस्थितीत चार स्थानकांपर्यंत चाचणी केली जाणार आहे. हा प्रकल्प केवळ प्रवास सुविधा निर्माण करणार नाही, तर शहराच्या आर्थिक, सामाजिक व पर्यावरणीय विकासालाही चालना देणार आहे.
मुख्यमंत्री देवेंद्र फडणवीस यांच्या हस्ते आणि उपमुख्यमंत्री तथा मुंबई महानगर प्रदेश विकास प्राधिकरणाचे (एमएमआरडीए) अध्यक्ष एकनाथ शिंदे, उपमुख्यमंत्री अजित पवार यांच्या प्रमुख उपस्थितीत मेट्रो मार्ग ४ व ४अ च्या टप्पा-१ प्राधान्य विभागावर तांत्रिक तपासणी व ट्रायल रनला सुरवात एमएमआरडीए करणार आहे.
प्रवासी सुरक्षेला एम.एम.आर.डी.ए. नेहमीच सर्वोच्च प्राधान्य देते. यासाठी स्वतंत्र सुरक्षा मूल्यांकनकर्ता (ISA) प्रमाणपत्राची प्रक्रिया सुरू केली जाईल आणि त्यानंतर सिएमआरएस ( CMRS ) मंजुरी घेतली जाईल. या सर्व वैधानिक मंजुरीनंतरच मेट्रो मार्ग ४ व ४अ प्रवाशांसाठी सुरू करण्यात येईल, अशी माहिती एमएमआरडीए प्रशासनाने दिली.
या चार स्थानकांवर मेट्रो ट्रायल रन
मेट्रो मार्ग चार (वडाळा-घाटकोपर-कासारवडवली) मधील तपासणी टप्पा-१ मधील चार प्राधान्य स्थानके असून यात घोडबंदर रोडवरील, गायमुख जंक्शन, गायमुख गाव कासारवडवली, विजय गार्डन या चार स्थानकांचं समावेश आहे. या प्रक्रियेत कमिशनर ऑफ मेट्रो रेल सेफ्टी (CMRS) यांच्या आवश्यकतेनुसार सर्व तात्रिक प्रणाली सज्ज आहेत की नाही याचे पुनरावलोकन करण्यात येईल. या विभागातील मूलभूत पायाभूत सुविधा उड्डाणपूल (Viaduct), मार्गिका (Track) आणि ओव्हरहेड इक्विपमेंट (OHE) पूर्ण झाल्या आहेत.
तपासणी व प्रारंभिक चाचणी धावांदरम्यान लोड कॅल्क्यूलेशनसाठी आणि सॉफ्टवेअर कॉन्फ़िगरेशनसाठी आवश्यक माहिती गोळा केली जाईल, तसेच सुरक्षित वाहतुकीसाठी आवश्यक असलेल्या सर्व प्रणालींची जसे की मेट्रो ट्रेन इत्यादी चाचणी घेऊन त्यांचे एकत्रीकरण केले जाईल.
