स्थानिक स्वराज्य संस्थेत महायुतीचा भगवा फडकवायचा उपमुख्यमंत्री एकनाथ शिंदे

महाविकास आघाडी सरकारच्या काळात विकासाच्या वाटेवर गतीरोधक टाकण्यात आले होते. मी मुख्यमंत्री झाल्यानंतर त्या सर्व अडथळ्यांना दूर करून विकासाला गती दिली, असे शिंदे म्हणाले.मुख्यमंत्री माझी लाडकी बहीण ही योजना जनतेच्या मनात घर करून बसल्याचेही ते म्हणाले. राज्यातील शेतकरी बांधव ऑक्टोबर-नोव्हेंबरपर्यंत पडणाऱ्या पावसामुळे संकटात आहेत. पण सरकार त्यांच्या पाठीशी ठामपणे उभे आहे. शेतकऱ्यांना मदतीचा हात देणे हे आमचे कर्तव्य असल्याचे शिंदे यांनी सांगितले.

मुंबईतील सर्व रस्ते कॉंक्रिटचे करत असून एकही रस्ता डांबरी राहणार नाही. मुंबईत खड्डा शोधून मिळणार नाही असा दावा देखील त्यांनी केला. त्याचबरोबर बाळासाहेब ठाकरे आपला दवाखाना, सुशोभीकरण प्रकल्प आणि नागरिकाभिमुख योजना सुरू असल्याचे त्यांनी सांगितले. विरोधकांकडे आता मुद्दे नाहीत. ते खोटेनाटे आरोप करतात. पण मी आरोपांना उत्तर देणार नाही. माझे उत्तर म्हणजे माझे काम आहे असे शिंदे म्हणाले.

शिवसेनेत कोणीही मालक किंवा नोकर नाही

शिवसेना हा कार्यकर्त्यांचा पक्ष आहे. येथे कोणी मालक नाही, कोणी नोकर नाही. जो काम करेल, तो पुढे जाईल. मी स्वतः कार्यकर्ता होतो, आहे आणि राहणार आहे. नागरिकांच्या समस्या सोडवा. अन्याय कुठे होत असेल तर तो सहन करायचा नाही. तुमच्या पाठीशी शिवसेना खंबीरपणे उभी आहे. ज्या विश्वासाने तुम्ही आलेले आहात, त्या विश्वासाला तडा जाऊ देणार नाही असेही शिंदे म्हणाले.

यावेळी ठाकरे गटाचे सचिव तथा प्रवक्ता डॉ. संजय लाखे पाटील, धुळे येथील ठाकरे गटाचे माजी नगरसेवक जितेंद्र जगताप, शहर संघटक विनोद जगताप, धुळ्याचे माजी सभापती वसंत पावरा, मनसे माथाडी उपाध्यक्ष प्रथमेश चव्हाण, अमित जंगम ( रायगड ), गोपीनाथ संसारे, मातंग समाज मुंबई अध्यक्ष विकी जाधव, शमशुद्दीन शेख यांच्यासह अन्य पदाधिकारी आणि कार्यकर्त्यांनी पक्ष प्रवेश केले.