कल्याण डोंबिवली पालिकेतील दोन अभियंत्यांना आयुक्तांची कारणे दाखवा नोटिस, मलवाहिन्या सफाई कामातील ठेकेदाराच्या कामात त्रुटींकडे दुर्लक्ष

या नोटिसांना या दोन्ही अभियंत्यांनी सात दिवसाच्या आत उत्तर द्यावयाचे आहे. याबाबतचे स्पष्टीकरण वेळेत दिले नाहीतर त्यांच्यावर कारवाई करण्याचा इशारा आयुक्त डाॅ. जाखड यांनी दिला आहे. मे. ॲकाॅर्ड वाॅटर टेक कंपनी, माहिती कार्यकर्ते कौस्तुभ गोखले यांनी मे. ग्रॅवीट इंजिनिअर्स कंपनीच्या कामाबद्दल तक्रारी केल्या होत्या. यापूर्वी तत्कालीन अतिरिक्त आयुक्त मंगेश चितळे यांनी याप्रकरणाची चौकशी केली होती. तो अहवाल लालफितीत होता. तक्रारदारांच्या तक्रारींची सखोल चौकशी करण्याचे आदेश आयुक्त डाॅ. जाखड यांनी अतिरिक्त आयुक्त हर्षल गायकवाड यांना दिले होते. याप्रकरणाची चौकशी करताना मे. ग्रॅविट कंपनीला मलवाहिन्या सफाईचे काम देताना यांत्रिकी विभागाने अनेक अनियमितता केल्या असल्याचे अतिरिक्त आयुक्त गायकवाड यांनी केलेल्या प्राथमिक चौकशीत स्पष्ट झाले आहे.

हेही वाचा : ठाण्यात बेकायदा नळजोडण्यांविरोधात मोहिम, मुंब्रा आणि दिव्यात ९७ बेकायदा नळजोडण्या तोडल्या

मे. ग्रॅविट इंजिनिअरिंग वर्क्स कंपनीला मुंबई महापालिकेने दिलेल्या कामाच्या प्रमाणपत्राची अधिकृतता तपासण्यात आली नाही. शासन निर्णयानुसार ठेकेदाराने यापूर्वी मुंबई पालिकेत केलेल्या कामाच्या व्याप्तीची माहिती यांत्रिकी विभागाने घेणे आवश्यक होते. त्याकडेही यांत्रिकी विभागाने दुर्लक्ष केले, असा ठपका अतिरिक्त आयुक्तांनी अहवालात ठेवला आहे.

मे. इग्नि क्लिनिंग सर्व्हिसेस यांनी मे. ग्रॅविट कंपनी बरोबर केलेला एक करार (हिरींग ॲग्रिमेंट) मे २०२३ मध्ये रद्द केला आहे. ही माहिती मे. इग्नि कंपनीने पालिकेला कळवुनही अभियंता पवार, राठोड यांनी ती माहिती प्रशासनाला दिली नाही. मे. ग्रॅविट कंपनीला काम देताना निविदा समितीची बैठक झाली होती का, वाहनाच्या प्रात्यक्षिकासाठी कंपनीला पत्र देण्यात आले होते. त्यानंतर आयुक्तांच्या आदेशाप्रमाणे निविदा समितीची पुन्हा बैठक घेतली होती का, असे अनेक प्रश्न नस्तीमध्ये अनुत्तरीत आहेत, असे अहवालात म्हटले आहे.

हेही वाचा : मुरबाडमध्ये महायुतीतच एकमेकांवर कुरघोडी, भाजप शिवसेनेकडून एकमेकांच्या पदाधिकाऱ्यांची फोडाफोडी

चौकशी अहवाल गायकवाड यांनी आयुक्त जाखड यांना सादर केला. आयुक्तांनी अहवालाप्रमाणे यांत्रिकी विभागाचे कार्यकारी अभियंता प्रवीण पवार, राजू राठोड यांनी कार्यालयीन शिस्तीचा भंग केला आहे. या गैरवर्तनाबाबत महाराष्ट्र नागरी सेवा व शिस्त नियमाने पवार, राठोड यांना कारणे दाखवा नोटिसा बजावल्या आहेत. हे खुलासे समाधानकारक नसल्यास या दोन्ही अभियंत्यांवर कारवाईचा बडगा उगारला जाईल, असे अधिकाऱ्याने सांगितले. मागील २० वर्षाहून अधिक काळ पवार, राठोड हे यांत्रिकी विभागात कार्यरत असल्याचे समजते.